Jambyldyq dárigerler ońtústikkoreıalyq áriptesterimen onlaın rejımde tájirıbe almasty
TARAZ. QazAqparat – Jambyldyq dárigerler onlaın semınar aıasynda Ońtústik Koreıadaǵy áriptesterimen koronavırýstyq ınfektsııanyń aldyn alý jáne onymen kúresý sharalaryn talqylady, dep habarlaıdy QazAqparat tilshisi.
Sheteldik dárigerler tájirıbelerimen bólisip, pandemııanyń ekinshi tolqynyna daıyndyq barystary týraly aıtyp berdi. Dárigerlerdiń «kezdesýi» Zoom platformasynda ótti. Konferentsııaǵa oblys ortalyǵy men aýdan dárigerleri de qatysty.
Ońtústik Koreıa sarapshylary qazir óz elderinde koronavırýsqa qatysty jaǵdaıdyń turaqtanǵandyǵyn jetkizdi. El azamattarynyń arasynda jańa jaǵdaılar tirkelmegen. Oǵan medıtsına qyzmetkerleriniń naqty jáne úılesimdi is-áreketteriniń, sondaı-aq azamattardyń túsinistiginiń arqasynda qol jetkizilgen. Onda barlyq jerde qorǵanysh maskasyn kııý jáne áleýmettik qashyqtyqty saqtaý árkim úshin mańyzdy qaǵıdaǵa aınalǵan. Dárigerler óz kezeginde sımptomsyz naýqastardy, COVID-19 jeńil túrimen jáne ınfektsııanyń aýyr túrimen aýyratyn naýqastarǵa bólip, olardy ártúrli statsıonarlarda emdegen.
Sonymen qatar, ońtústikkoreıalyq dárigerlerdiń aıtýynsha, aýrýdyń erte dıagnostıkasy jaqsy nátıje bergen. Dárigerler ózin nashar sezingenderdiń barlyǵynan koronavırýsqa test alǵan.
Jambyldyq dárigerler áriptesterin qyzyǵýshylyqpen tyńdap, suraqtar joldady. Mysaly, oblystyq qan ortalyǵynyń ókilderin Ońtústik Koreıadaǵy koronavırýspen aýyryp jazylǵan adamdardyń ımmýndyq plazma donorlyǵynyń qoldanysy qyzyqtyrdy. Mamandar bul ádis KVI-men aýyratyn naýqastardy emdeý kesheninde belsendi qoldanylatynyn aıtty.
Sondaı-aq, Ońtústik Koreıa dárigerleri óz elderindegi jaǵdaıdyń turaqtanǵanyna qaramastan, olar kúzde kútiletin pandemııanyń ekinshi tolqynyna daıyn ekendikterin tilge tıek etti. Ol úshin qosymsha aýrýhanalar ashylyp, dárigerler daıarlyqtan ótýde.
Tıimdi semınar sońynda eki eldiń dárigerleri mazmundy oı-pikirleri úshin bir-birlerine alǵys aıtyp, bul tájirıbe almasý koronavırýsqa qarsy kúrestegi berik yntymaqtastyqtyń bastaýy bolatynyna senim bildirdi.
