Jambyldyq dárigerler Kongo-qyrym bezgeginen kóz jumǵan bala týraly aıtyp berdi
TARAZ. QazAqparat - Bıyl alǵash ret bir adam Jambyl oblysynda Kongo-qyrym qandy bezgeginen (KQQB) kóz jumdy, dep habarlaıdy QazAqparat tilshisi Jambyl oblystyq qoǵamdyq densaýlyq saqtaý departamentine silteme jasap.
Aıta keteıik, Jambyl oblysy Qazaqstandaǵy osy qaýipti indet taraǵan óńirdiń qataryna kiredi. Jyl saıyn kún jylyna bastaǵanda óńirde Kongo-qyrym qandy bezgegine shaldyqqandar tirkele bastaıdy. Olardyń arasynda kóz jumǵandary da bar.
Vedomstvonyń deregi boıynsha, bıyl indetke shaldyǵý kúdigimen kene shaqqan 557 adam kelgen. Olardyń barlyǵy qajetti medıtsınalyq tekserýden ótti, eshqaısysy KQQB-ǵa shaldyqpaǵan.
Oblystyq qoǵamdyq densaýlyq saqtaý departamentiniń basshysy Berkin Jarqynbekovtyń habarlaýynsha, Jambyl oblysyndaǵy Kongo-qyrym bezgeginiń 5 tabıǵı oshaǵy - Sarysý (11), Moıynqum (13), Talas (7), Jambyl (4), Baızaq (8) aýdandarynyń 48 eldi mekeninde ornalasqan. Olardyń qataryna Taraz qalasy da (5) kiredi.
«Jyl saıyn bizde osy dertten adamdar kóz jumady. Bıyl 1 oqıǵa tirkeldi. Adamdar dárigerlerge kesh júginedi. Olar ýaqytyly kelgende, tolyqtaı aıyǵyp ketýge kepildik beremiz. Qyzmetkerlerimiz qaýipti oshaqtardy anyqtaý boıynsha aýqymdy jumys júrgizip jatyr. Qazirgi tańda 38 181 kene jınaldy, olardyń 3 330-y tekserildi. Infektsııasy bar keneler sany 109, ıaǵnı 3,5%. Kenelerdiń ózderi aýyrmaıdy, olar tek aýrý taratýshy ǵana. Qazirgi ýaqytta KQQB aýrýyna shaldyqqan jaǵdaı oblysta tirkelgen joq. Kene shaǵyp, aýrýhanaǵa jetkizilgenderdiń barlyǵy 14 kún boıy baqylaýǵa alynady. Qazir olardyń 344-y baqylaýdan shyǵaryldy», - dep túsindirdi Berkin Jarqynbekov.
«Jambyl oblysynda bezgekten kóz jumǵan 10 jasar qyz Ózbekstan azamatshasy», dep túsindirdi vedomstvoda. Ol Jambyl oblysyna ata-anasymen 6 sáýirde Qyrǵyz Respýblıkasynan kelgende naýqas bolǵan. Onyń qyzýy kóterilip, aýyrǵandyqtan anasy úıde emdemek bolǵan. Alaıda, otbasynyń tanys dárigeri qaýipti aýrýǵa shaldyqty dep kúdiktenip, jedel-járdem shaqyrǵan. Ol jansaqtaý bóliminde jatyp, qaıtys boldy. Aýrýy asqynǵandyqtan, qyz bala aman alyp qalý múmkin bolmaǵan.
