Jambyldyq dárigerler alǵash ret bas súıekke tıtan plastık qoıý arqyly ota jasady
TARAZ. QazAqparat – Jambyl oblysynda alǵash ret 15 jastaǵy balaǵa álemdi moıyndatqan nemis tehnologııasy arqyly bas súıeginiń ornyna tıtan plastık (jasandy temir) qurylǵysyn qoıý boıynsha kúrdeli ota jasaldy, - dep habarlaıdy QazAqparat tilshisi.
Jasósipirim alǵashqyda óziniń aýyrǵanyn elemeı, ýaqyt sozyp alǵan. Keıinnen aıaq astynan jaǵdaıy nasharlap, álsireı bastaǵandyqtan ata-anasy balany jedel járdem kómegimen oblystyq kópbeıindi balalar aýrýhanasyna ákelgen. Kompıýterlik tomografııalyq saraptamanyń qorytyndysy boıynsha onyń burynnan bas súıeginde aqaýy bar ekeni anyqtalyp, ári ıshemııalyq ınsýlt alyp úúlgerni belgili bolady. Dárigerler shuǵyl túrde ota jasap, balanyń ómirin saqtap qalýǵa kirisken.
Bilikti neırohırýrg Saıat Jumabaevtyń basshylyǵymen balaǵa álemge áıgili nemis tehnologııasy arqyly oń jaq bas súıeginiń isigen bóligi ornyna tıtan plastık (jasandy temir) salyndy.
Eń alǵash ret Germanııada qoldanylǵan tıtandyq plastıka – qazirgi eń sońǵy hırýrgııalyq jetistikterdiń biri bolyp eseptelinedi. Olar 1996 jyldan beri shirigen úsh súıekti alyp tastap, ornyna sondaı úlgidegi tıtannan jasalǵan protez salýda. Búginde Germanııada ondaı protezdiń 25 túri shyǵarylyp, on jyldan beri qoldanysqa engen.
«Bul protez temir bolǵanymen, salmaǵy 2-aq mıkrogramm, óte juqa ári názik. Tıtandyq plastıkalyq operatsııanyń nátıjesinde mı tamyrlarynyń qabynýy, isiný jaǵdaılary azaıady. Ony salý jumysy asqan sheberlikti talap etedi. Qazirgi tańǵa nemister Eýropa kóleminde 120 myń tıtan protezin ilgen. Osy arqyly adamnyń ómir súrý qabiletin arttyryp qana qoımaı, sonymen birge bastyń ishindegi qabyný, isiný jáne jalpy aýrý jaǵdaılarynyń aldyn alatyn bul tásildiń elimizde qoldanylyp kele jatqanyna kóp bolǵan joq. Modeldengen tıtan torynyń qoldanylýy arqyly bas súıeginiń kemistigine jasalatyn otany Tarazdyq dárigerler alǵash ret jasap otyr», -delingen oblystyq densaýlyq saqtaý basqarmasynyń habarlamasynda.
Búginde naýqastyń otadan keıingi jaǵdaıy kún saıyn jaqsaryp keledi. Alaıda, jasóspirimniń densaýlyǵyn udaıy baqylap otyrý úshin dárigerler oǵan tekserilip turýdy jáne jylyna eki márte ońaltý ortalyǵyna kelip, turaqty em qabyldaýdy usynǵan.
