Jambyldyq birqatar názik janǵa Memleket basshysynyń quttyqtaý haty tabystaldy
TARAZ. QazAqparat – Jambyl oblysynyń ákimi Berdibek Saparbaev Halyqaralyq áıelder kúni merekesine oraı óńirdiń áleýmettik-ekonomıkalyq, qoǵamdyq-rýhanı damýyna aıtýly úles qosyp júrgen birqatar názik jandardy qabyldap, QR Prezıdenti Qasym-Jomart Toqaevtiń quttyqtaý hatyn tabystady, - dep habarlaıdy QazAqparat tilshisi.
Memleket basshysynyń quttyqtaýyna ıe bolǵandardyń qatarynda Jambyl oblystyq máslıhatynyń depýtaty Aıgúl Aqshalova, «Anaǵa taǵzym» rýhanı-adamgershilik damý ortalyǵynyń dırektory Elmıra Myrza-Ǵalı, Bıologııalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zakarıa, osy ınstıtýttyń zerthana meńgerýshisi Kúláısan Sultanqulova, aqyndar Úmit Bıtenova, Shyrynkúl Mamaserikqyzy, Paralımpıada oıyndarynyń jeńimpazy (júzý) Zýlfııa Ǵabıdýllına, Kásipqoı boksshy Fırýza Sharıpova bar.
Aımaq basshysy olardyń elimiz ben óńirdi órkendetý, rýhanı damytý, sport arqyly abyroıyn asqaqtatýdaǵy jemisti ári jeńisti eńbekterin elep ótip, Memleket jáne oblys basshylyǵy atynan alǵysyn bildirdi.
Berdibek Saparbaev elimizde analar men balalarǵa barynsha kóńil bólinip, áleýmettik qorǵaý, densaýlyqtaryn saqtaý jolynda júıeli jumystar júrgizilip jatqanyn basa aıtty. Názik jandarǵa óz qarym-qabiletterine qaraı kez-kelgen salada jetistikke jetý úshin barlyq jaǵdaı jasalǵanyn atap ótti. Sondaı-aq, olardyń urpaq tárbıesindegi mańyzdy róline toqtaldy.
Budan son saltanatty túrde QR Prezıdentiniń quttyqtaý hattary tabystaldy.
«... Sizdi 8-naýryz Halyqaralyq áıelder kúnimen quttyqtaımyn!
Barsha tirshilik ıesine nár bergen kóktemniń alǵashqy merekesi júregińizge meıirim, janyńyzǵa kúsh-qýat syılasyn!.
Árdaıym óz ortańyzda syıly bolyp, qurmet pen qoshemetke bólene berińiz. Sizge zor densaýlyq, baıandy baqyt jáne qut-bereke tileımin!»-delingen quttyqtaý hatta.
