Jambyldyq bapker bıýdjetten 8 mln teńgeni jymqyrdy degen kúdikke ilindi

NUR-SULTAN. QazAqparat - Jambyl oblysynda bapker bıýdjet qarajatyn jymqyrdy dep kúdikke ilindi, dep habarlaıdy QazAqparat Sybaılas jemqorlyqqa qarsy is-qımyl ulttyq bıýrosynyń baspasóz qyzmetine silteme jasap.

Sybaılas jemqorlyqqa qarsy is-qımyl ulttyq bıýrosynyń Jambyl oblysy boıynsha departamenti oblystyq ákimdiktiń densaýlyq saqtaý jáne sport basqarmasy armrestlıng boıynsha bapkeriniń bıýdjet qarjysyn jymqyrý faktisin anyqtady.

«Ol jalǵan bastapqy tólem eseptemelerin usyný arqyly issapar shyǵynyna bólingen 8 mln teńge somasyndaǵy bıýdjet qarajatyn jymqyrdy dep kúdikke ilinip otyr. Kinásin tolyq moıyndaýyna jáne jedeldetilgen sotqa deıingi óndiristi qoldaný týraly ótinishine baılanysty protsestik ustaý qoldanylǵan joq» delingen habarlamada.

Búginde tergeý jalǵasýda. Kúdiktige qatysty túpkilikti úkimdi sot shyǵarady.