Jambyldyq baqtashy 600 bas qoımen boranda adasyp ketken
TARAZ. QazAqparat – Jambyl oblysyndaǵy orman sharýashylyǵy mekemesiniń qyzmetkerleri Moıynqum aýdanyndaǵy «Nursultan» sharýa qojalyǵynyń joǵalyp ketken shopanyn tapty, dep habarlaıdy QazAqparat tilshisi.
Oqıǵa bylaı órbigen. Atalmysh sharýa qojalyǵynyń ıesi óziniń malshysy 600 bas qoımen birge joǵalǵandyǵyn aıtyp, «Ulanbel» orman sharýashylyǵy jáne janýarlar dúnıesin qorǵaý mekemesine habarlasady, izdestirý jumystaryna qoldaý kórsetýdi suraıdy.
Sharýa ıesi 12 naýryz kúni mal jaıyp shyǵyp, qaıta oralmaǵan shopandy qansha izdegenimen, nátıje bolmaıdy. Sharýa ıesi arada eki kún ýaqyt ótip ketkendigin, izdestirip taba almaǵandyǵyn aıtady.
Oblystyq tabıǵı resýrstar jáne tabıǵat paıdalanýdy retteý basqarmasynyń málimetinshe, jedel túrde atalǵan mekemeden 1 traktor men 1 ÝAZ avtokóligi jáne 10 adam kómek qolyn sozyp, izdestirýge jumylǵan.
«Nursultan» sharýa qojalyǵy «Ulanbel» orman sharýashylyǵy mekemesine qarasty memlekettik orman qorynda ornalasqan. Sol sebepti mekeme qyzmetkerleriniń aýmaqty jaqsy bilgendiginiń arqasynda araǵa kóp ýaqyt salmaı Ulanbel aýylyna 4 shaqyrymdaı jerden shopandy tapqan.
Joǵalǵan azamattyń sózinshe, jaıylymǵa shyqqannan keıin soqqan borannyń saldarynan jeldiń yǵymen júrip, joldan adasyp qalǵan.
Úsh kún dalada túnep qalǵan azamat jańa tóldegen qoı qozylaryn da aman alyp qalǵan. Osylaısha, joǵalǵan azamat pen otar qoı sharýa ıesine din aman oraldy.
