Jambyldyq agrokásipkerlerdiń máseleleri qalaı sheshilýde
TARAZ. QazAqparat – Jambyl oblysynyń ákimi Berdibek Saparbaevtyń qatysýymen ótken keńeste «Taraz» áleýmettik-kásipkerlik korporatsııasynyń 2020 jyly atqarǵan jumys nátıjeleri qaraldy, dep habarlaıdy QazAqparat tilshisi.
Ótken jyly óńirdegi kásipkerlerge 13,8 mıllıard teńgege karjylaı kómek kórsetken korporatsııa sharýalardyń basty máselelerin sheshýge belsendi atsalysýda.
Jıynda eseptik baıandama jasaǵan «Taraz» ÁKK» AQ basqarma tóraǵasy Oljas Qarjaýov sý tapshylyǵy máselesin sheshý jóninde atqarylǵan jumystarǵa da toqtaldy. Máselen, ótken jyly jergilikti sharýalar «Taraz» ÁKK arqyly 2,5 myń gektarǵa jýyq jerdi sýarýǵa múmkindik beretin 132 jańbyrlatqysh qondyrǵy satyp aldy.
Aýyl sharýashylyǵy tehnıkalaryn jańartý jaıy da kún tártibindegi basty máselelerdiń biri. Osyǵan oraı «AgromashHoldıng KZ» kompanııasymen birlesip «Trade In» baǵdarlamasy iske qosyldy. Birinshi kezeńde sharýalarǵa 10 birlik aýyl sharýashylyǵy tehnıkasy berilse, taǵy 60 ótinim qarastyrylýda. Jalpy, esepti kezeńde sharýalar 3 mıllıard teńgeden astam somaǵa 329 birlik túrli aýyl sharýashylyǵy tehnıkasyn lızıngke aldy.
Áleýmettik mańyzy bar azyq-túlik ónimderiniń baǵasyn turaqtandyrý maqsatynda Taraz qalasynda 15 áleýmettik pavılon ashyldy. Mundaǵy baǵalar naryqtyq baǵadan 10-20 paıyzǵa tómen. Áleýmettik dúkender kún saıyn segiz myńǵa jýyq adamǵa qyzmet kórsetedi. Olar turaqtandyrý qorynyń ǵana emes, sonymen qatar jergilikti aýylsharýashylyq taýar óndirýshileriniń ónimderin de satady.
Aımaq basshysynyń tapsyrmasyna sáıkes, baý-baqshany damytý, atap aıtqanda qulpynaı men tańqýraı ósirý boıynsha belsendi sharalar qabyldanýda. Import úlesin azaıtý úshin korporatsııa jemis-jıdek ósirýmen aınalysatyn sharýalarǵa 60 mıllıon teńge baǵyttaǵan.
Baıandamashynyń aıtýynsha, balyq sharýashylyǵymen aınalysýǵa nıettilerdiń sany kún saıyn artyp keledi. Osylaısha, esepti kezeńde eki balyq sharýashylyǵyna 50 mıllıon teńge somasynda qarjylyq qoldaý kórsetilgen. Taǵy 20 ótinim qarastyrylýda.
Oblys ákimi qolǵa alynǵan jumystarǵa tıisti taldaý júrgize otyryp, odan ári jalǵastyrý qajettigin atap ótti. Ol bul oraıda jumsalǵan bıýdjet qarajatynyń ár bir teńgesi bes ese tabys ákelýi tıis ekenin basa aıtty.
«Kezinde elimiz boıynsha eń jaqsy kartop – Jýalynyki bolatyn. Sol ataqty jańǵyrtyp, pııaz, kartop, qulpynaı, balyq ónimderin oblystyń brendine aınaldyrý qajet», – degen Berdibek Saparbaev suranysqa ıe, túsimi joǵary jańa ónimder egýge de basymdyq berýdi mindettedi.
Keńesti qorytyndylaı kele, oblys ákimi atqarylǵan jumystarǵa oń baǵa berip, jańa bastamalardy iske asyrýdyń mańyzdylǵyn jetkizdi.
