Jambyldyq 150 qurylysshy men 30 volonter Arysty qalpyna keltirýge atsalysyp júr

TARAZ. QazAqparat -Jambyldyq qurylysshylar men eriktiler Arys qalasyn qalpyna keltirý, áleýmettik sharalardy atqarý boıynsha qyzý jumystar júrgizýde, dep habarlaıdy QazAqparat.

Buǵan deıin habarlanǵandaı, qala aýmaǵy 17 sektorǵa bólingen. Sonyń ishinde úshinshi sektorǵa qarasty 327 jeke turǵyn úıdi qalpyna keltirý jumystary Jambyl oblysyna júktelgen bolatyn. Budan bólek, bul bóliniste taǵy 14 áleýmettik jáne kommertsııalyq nysan anyqtalǵan.

«Búginde oblysqa tıesili aýmaqtaǵy 11 kóshede ornalasqan 327 jeke turǵyn úı tolyǵymen zerdelenip bitti. Nátıjesinde qıraǵan 3 úıdiń ekeýi - tolyq, bireýi - jartylaı qalpyna keltiriletin boldy. Buǵan jumsalatyn shyǵyndar respýblıkalyq bıýdjet pen arnaıy qorǵa jınalǵan qarajattan qarastyrylmaq»,-deıdi Jambyl oblysy ákiminiń keńesshisi Birjan Sóktaı Arystaǵy shtabtyń jumysynan xabar berip.

Aıta keteıik, qazirgi tańda jambyldyq 16 qurylys kompanııasynan 150 qurylysshy Arystaǵy 35 jeke turǵyn úı boıynsha jóndeý jumystaryn bastap ketti.

Sondaı-aq, 30-dan asa jambyldyq erikti zardap shekken arystyqtarǵa kómek kórsetip, aıanbaı ter tógýde. Odan bólek, belsendi eriktiler men búlingen úılerdiń turǵyndarynan qoǵamdyq komıssııa quryldy. Komıssııa músheleri ár 10 úıge bólinip, aýysym boıynsha túrli áleýmettik máselelermen aınalysýda.