Jambyldyq 1000-nan astam pedagog koronavırýsqa qarsy vaktsına qabyldaǵan
TARAZ. QazAqparat – Jambyl oblysynda bilim salasyndaǵy qyzmetkerlerdi koronavırýsqa qarsy vaktsınatsııalaý júrgizilýde. Onyń barysy týraly óńirlik kommýnıııalar qyzmetiniń aqparat alańynda oblystyq bilim basqarmasynyń basshysy Gúlnar Hodjabergenova aıtyp berdi, - dep habarlaıdy QazAqparat tilshisi.
El Prezıdenti Qasym-Jomart Toqaevtyń tapsyrmasyna sáıkes 1 aqpannan bastap qazaqstandyqtarǵa ekpe salyna bastady. Al naýryz aıynan elimizdegi pedagogtarǵa ekpe saldyrý naýqany bastalǵan bolatyn.
«Búginge deıin óz erkimen ótinish bildirgen oblystaǵy 1068 bilim salasynyń qyzmetkeri erikti túrde ekpe saldyrdy. Onyń ishinde balabaqsha tárbıeshileri, bastaýysh synypqa sabaq beretin pedagogtar, kolledj ustazdary, bilim basqarmasy men bilim bólimderiniń qyzmetkerleri bar. Búgingi kúni ekpe saldyrǵan pedagogtardyń densaýlyǵy qalypty. Qandaı da bir keri áserleri bolǵan joq»,-dedi basqarma basshysy.
Aıta keteıik, ustaz óz erkimen vaktsına alýǵa jazbasha kelisim bergen soń, aldymen arnaıy ekpe úshin daıyndalǵan bólmege baryp densaýlyǵyn teksertedi. Onda dene qyzýy men qan qysymyn ólshetedi. Kinárat bolmaǵan soń birinshi dozasyn qabyldaıdy. Keıin 30 mınýt dárigerdiń baqylaýynda bolady. Vaktsınany alǵannan keıin de pedagogtar dárigerlerdiń baqylaýynda bolady.
«Óńirdegi pedagogtarǵa ekpe týraly túsindirý jumystary júrgizilgen. Balalardyń ómiri men densaýlyǵynyń qaýipsizdigi úshin ár muǵalim jaýapty. Sondyqtan vaktsına alýdy ár pedagog azamattyq mindeti dep esepteý kerek»,-dedi basqarma basshysy.
