Jambyldan basqa óńirge qarasora tasymaldaýshylardy ustaý úshin jedel shara bastaldy
Jambyl oblysy polıtsııa departamentiniń bastyǵy Janat Súleımenov jedel aldyn alý sharasy bastalǵanǵa deıin birneshe kún buryn daıyndyq máseleleri boıynsha Shý aýdanynda keńes ótkenin aıtty.
Onda alǵa qoıylǵan mindetter anyqtalyp, jedel is-qımyldardy uıymdastyrý boıynsha nusqaý berilgen.
Jumysqa barlyq vedomstvolyq qurylymdar jumyldyrylǵan.
«Jyl saıyn polıtseıler Jambyl oblysynyń qumdy aımaqtarynan basqa óńirlerge jabaıy qarasorany shyǵarý arnasyn jabý boıynsha operatsııalar júrgizedi», - dedi J.Súleımenov.
Ótken jyly «Qarasora-2020» jedel-aldyn alý is-sharasynyń qorytyndysy boıynsha 574 esirtki quqyq buzýshylyǵy anyqtaldy, onyń ishinde 139 derek – esirtki qylmysy, 435 – qylmystyq teris qylyq.
Esirtki qylmystarynyń ishinde esirtkini ótkizýdiń – 73 deregi, 38 – asa iri mólsherde saqtaý, 3 – esirtki kontrabandasy jáne 25 quramynda esirtki bar ósimdikterdi ósirý deregi tirkeldi.
Zańsyz aınalymnan 2 tonna 867 keli túrli esirtki tárkilendi.
Esirtki qylmysyna qarsy is-qımyl basqarmasynyń qyzmetkerleri men jergilikti atqarýshy bıliktiń ókilderi birlesip, esirtkini órteý, shabý, jerdi aýdarý, sondaı-aq ýly hımıkattardy qoldaný jolymen joıý sharalaryn turaqty negizde júzege asyrýda.
Polıtsııa general-maıory, sonymen qatar, esirtki bıznesine qarsy kúres – aldyn alý, aqparattyq alańǵa monıtorıng júrgizý, graffıtı-jazbalardy joıý sekildi taǵy birneshe baǵytta júrgiziletinin atap ótti.
