Jambyldaǵy jarylystan kúıip qalǵandardyń biri jansaqtaý bóliminde jatyr

TARAZ. QazAqparat - Jańa Jambyl fosfor zaýytynda bolǵan jarylysta hımııalyq kúıik shalǵan eki jumysshynyń bireýi jansaqtaý bóliminde jatyr, dep habarlaıdy QazAqparat tilshisi.

Jambyl oblystyq densaýlyq saqtaý basqarmasy baspasóz qyzmetiniń aıtýynsha, zaýytta ıterýshi bolyp jumys isteıtin Danııar Ormanovtyń denesiniń 22 paıyzyn kúıik shalyp, jansaqtaý bóliminde jatyr.

Al tsehtyń shıkizat daıyndaý jónindegi jetekshi ınjeneri Shahadııar Qaldybaı 15 paıyz kúıikpen jalpy bólimge jatqyzylǵan.

Qazir tergeý amaldary júrgizilip jatyr.

Memlekettik organdar ókilderiniń qatysýymen arnaıy komıssııa quryldy. Aldyn ala boljam boıynsha, jarylysqa qaýipsizdik erejelerin saqtamaý sebep bolǵan.

«Jambyl fosfor zaýytyndaǵy jarylys faktisi boıynsha polıtseıler QR Qylmystyq kodeksiniń 156-babynyń 2-bóligi boıynsha qylmystyq is qozǵady. Bastapqy tergeý amaldary eńbek ınspektsııasymen birlesip júrgizilip jatyr. Eki jábirlenýshi de aýrýhanaǵa jatqyzyldy. Tergeý barysy baqylaýda», – dep habarlady Jambyl oblystyq polıtsııa departamentiniń baspasóz qyzmeti.

Buǵan deıin Jańa Jambyl fosfor zaýytynda jarylys bolǵanyn habarlaǵan bolatynbyz.