Jambyldaǵy jarylystan qaza tapqan áskerı prokýrordyń otbasyna memlekettik nagrada tapsyryldy

NUR-SULTAN. QazAqparat - Búgin Bas prokýratýrada Jambyl oblysynyń Baızaq aýdanyndaǵy jarylys kezinde qaza tapqan Ońtústik óńirdiń áskerı prokýrory Arman Qýanyshuly Qapezovti eske aldy, dep habarlaıdy QazAqparat QR Bas prokýratýrasynyń baspasóz qyzmetine silteme jasap.

Іs-sharaǵa prokýratýra qyzmetkeriniń anasy - Dilda Qapezova, jubaıy - Ásemgúl Qapezova, balalary, jaqyn týystary, sondaı-aq Bas prokýratýra ujymy qatysty.

Memleket basshysynyń tapsyrmasy boıynsha Ǵızat Nurdáýletov Dildá Qapezovaǵa I dárejeli «Aıbyn» ordenin tapsyrdy. Onyń ulyn qyzmettik boryshyn atqarý kezinde kórsetken batyldyǵy men janqııarlyǵy úshin qaıtys bolǵannan keıin marapattaǵan bolatyn.

Áskerı prokýrordyń anasyna ulyn jáne naǵyz ofıtserdi laıyqty tárbıelegeni úshin alǵys bildirdi.

Óz kezeginde, Qapezovter januıasy jaqyndaryn joǵary nagradamen marapattaǵany úshin Prezıdentke rızashylyq bildirdi.

Bas Prokýror óz sózinde Arman Qapezovtiń prokýratýra júıesinde 24 jyl jumys istep, jaýapkershiligi mol jáne bilikti basshy bolǵanyn, óziniń áskerı boryshyn sońyna deıin abyroımen oryndaǵanyn atap ótti.

Marqumnyń týystaryna arnaǵan sózinde Ǵ.Nurdáýletov prokýratýra organdary onyń otbasyn qoldaýǵa qajetti barlyq sharalardy qabyldaıtynyn jetkizdi.

Ol Arman Qapezovtiń erlik isteri bolashaq urpaq úshin, eń aldymen, prokýratýranyń jas qyzmetkerleri úshin árdaıym úlgi bolatynyn erekshe atap ótti.