Jambyldaǵy jarylys: Joǵalǵan áskerıdi izdeý jumystary bir sátke de toqtamaıdy

TARAZ. QazAqparat – Jambyl oblysynda joǵalǵan áskerı Baýyrjan Dáýitbaevty izdeý jumystary jalǵasýda,-dep habarlaıdy QazAqparat tilshisi.

Іzdestirý jumystaryna 500-den astam adam tartyldy, olardyń ishinde Jambyl oblysy Polıtsııa departamentiniń, TJ departamentiniń qyzmetkerleri, QR Ulttyq ulannyń 5513 jáne «Ońtústik» óńirlik qolbasshylyǵynyń 91678 áskerı bóliminiń áskerı qyzmetshileri, «Ormanshylar» azamattyq personalynyń ókilderi jáne týystary bar. Olar úsh topqa bólindi.

Barlyǵy 50 tehnıka jumyldyryldy. Arnaıy tikushaq ta jumyldyryldy. Іzdeý jasaqtary taýly jerlerdi de sholýda. «Ońtústik» óńirlik qolbasshylyǵynyń 91678 áskerı bóliminiń qyzmetshileri izdeýge atpen attandy.

«Jambyl oblysynyń ákiminiń tapsyrmasymen habar-osharsyz ketken jaýynger Baýyrjan Dáýitbaevty izdeý sharalary kúsheıtildi. Іzdestirý jumystary birden birneshe baǵytta júrgiziledi jáne bir sátke de toqtamaıdy», - dedi Jambyl oblysy ákiminiń orynbasary Talǵat Mamaev.

Joǵalǵan áskerıdiń aǵasy Marat Dáýitbaev ta izdestirýge belsene qatysýda.

«Birinshi izdestirý tobymen birge jaqyn mańdaǵy eldi mekenderdiń aýmaqtaryn áýeden sholyp shyqtyq. Ókinishke oraı, izdeý sharalary nátıje bermedi. Biraq biz úmit úzbeımiz jáne aǵamyzdy tabamyz degen senimdemiz», - dedi ol.

Osyǵan deıin 26 tamyz kúni Jambyl oblysynyń Baızaq aýdanynda oq-dári qoımasynan órt shyǵyp, artynan jarylǵany habarlanǵan bolatyn.

Oqıǵanyń saldarynan barlyǵy 17 adam qaza tapty. Olardyń arasynda ishki ister organynyń qyzmetkerleri, áskerıler men tótenshe jaǵdaılar qyzmetiniń ókilderi, áskerı prokýror bar. Sondaı-aq bir adam joǵalyp, ol izdestirilip jatqany jarııalandy.