Jambyldaǵy jarylys týraly jalǵan aqparat taratqan 26 jastaǵy jigit ustaldy
NUR-SULTAN. QazAqparat – Jambyl oblysynda bolǵan tótenshe jaǵdaı týraly jalǵan aqparat taratqan jas jigit ustaldy, dep habarlaıdy QazAqparat QR Іshki ister mınıstrliginiń baspasóz qyzmetine silteme jasap.
«Jambyl oblysyndaǵy jarylystar týraly áleýmettik jelilerde jalǵan aqparat taratqan azamat ustaldy. 27 tamyzda ınternet jelisine monıtorıng júrgizý barysynda Instagram jelisinde belgisiz bireýdiń daýystyq súıemeldeýmen vıdeo jarııalaǵany anyqtaldy. Er adamnyń aıtýy boıynsha Baızaq aýdanynda ornalasqan áskerı bólimniń aýmaǵynda bolǵan jarylystardy onyń qýatyna baılanysty joıý múmkin emes, kóptegen zardap shekkender, onyń ishinde dene músheleri bólshektenip qalǵandar da bar degen. Bul aqparat shyndyqqa sáıkes kelmeıdi», - delingen habarlamada.
ІІM málim etkendeı, jedel-izdestirý sharasy barysynda polıtsııa qyzmetkerleri oblystyń 26 jastaǵy turǵynyn anyqtap, ustady jáne kúdikti óz kinásin tolyq moıyndaǵan.
«Atalǵan fakti boıynsha QR QK-niń 274-baby 2-bóliginiń 3-tarmaǵy «Qoǵamdyq tártipti buzý, buqaralyq aqparat quraldaryn nemese telekommýnıkatsııa jelilerin paıdalaný qaýpin týdyratyn jalǵan aqparat taratý» boıynsha sotqa deıingi tergeý júrgizilýde. Mundaı qylmysty jasaǵany úshin úsh jylǵa deıin bas bostandyǵynan aıyrý jazasy qarastyrylǵan», - deıdi vedomstvodan.
Sondaı-aq, resmı habarlamada QR QІJK 201-babyna sáıkes sotqa deıingi tergeý áreketteri júrgizilýine baılanysty qosymsha aqparattyń jarııalaýǵa bolmaıtyndyǵy aıtylǵan.
