Jambyldaǵy jarylys: Reanımatsııadaǵy 5 adamnyń ekeýiniń jaǵdaıy aýyr

TARAZ. QazAqparat – Densaýlyq saqtaý mınıstri Alekseı Tsoı Taraz qalasynyń aýrýhanasyna baryp, Baızaq aýdanyndaǵy №28349 áskerı bóliminiń oq-dári qoımasyndaǵy jarylystan zardap shekkenderdi emdeý jaǵdaıymen tanysty, dep habarlaıdy QazAqparat tilshisi.

Tótenshe oqıǵaǵa baılanysty Taraz qalasyna ushyp kelgen mınıstr Alekseı Tsoı jarylystan zardap shekkender em alyp jatqan palatalar men reanımatsııa bólimshelerin aralap, dárigerlermen jáne klınıka basshylyǵymen birge naýqastardyń jaǵdaıyn talqylady.

«Barlyǵy 98 azamat medıtsınalyq kómekke júgindi. Olardyń 37-si aýrýhanaǵa jatqyzyldy, qalǵandary jaraqat pýnktterinde tıisti kómek alyp, úılerine jiberildi. Patsıentterdiń báriniń jaǵdaıy turaqtanyp, shok jaǵdaıynan shyqty, olarǵa naqty em kórsetilip jatyr», - dedi Alekseı Tsoı.

Vedomstvonyń resmı saıtyndaǵy málimetke súıensek, Taraz qalasynyń statsıonarlarynda jatqan 37 zardap shegýshiniń beseýi reanımatsııada, ekeýiniń jaǵdaıy aýyr.

«70 naýqas ambýlatorııalyq emdeýge aýystyryldy. Jarylys saldarynan zardap shekken adamdarǵa medıtsınalyq kómek kórsetý úshin 37 jedel medıtsınalyq kómek jáne sanıtarlyq avıatsııa brıgadasy jumyldyryldy Ulttyq shuǵyl medıtsınany úılestirý ortalyǵy aýyr haldegi reanımatsııadaǵy patsıentterge medıtsınalyq kómek kórsetý boıynsha telekonsýltatsııa ótkizdi. Búgin tańerteń Almaty qalasynan sondaǵy №4 jáne №7 qalalyq aýrýhanalardyń reanımatolog, kombýstıolog travmatolog dárigerlerinen turatyn medıtsınalyq avıatsııanyń mobıldi brıgadasy ushyp keldi», - dep jazady mınıstrliktiń saıty.

Sapar sońynda Alekseı Tsoı zardap shekkenderge der kezinde medıtsınalyq kómek kórsetken dárigerlerge alǵys bildirgen.

«Ol oblysta naýqastardy emdeýge baılanysty problemalyq máseleler joq ekenin atap ótti. Densaýlyq saqtaý mınıstrligi tarapynan da barlyq qajetti qoldaý kórsetiletin bolady», - delingen resmı málimette.