Jambyldaǵy zaýyt maska shyǵarýdy táýligine 20 myńnan 70 myńǵa jetkizdi
TARAZ. QazAqparat – Koronavırýs pandemııasy saldarynan suranystyń kúrt ósýine baılanysty týyndaǵan medıtsınalyq maska tapshylyǵyn tómendetý maqsatynda Jambyl oblysynyń ákimdigi jergilikti farmatsevtıkalyq zaýyttarmen óndiris kólemin ulǵaıtý týraly kelisimge qol jetkizdi, dep habarlaıdy QazAqparat oblys ákimdigine silteme jasap.
Bul baǵyttaǵy kásiporyn táýlik boıy jumys rejimine kóship, nátıjesinde táýligine shyǵarylatyn medıtsınalyq maska kólemin 20 myńnan 70 myń danaǵa deıin arttyrdy. Onyń ishinde 40 myń maska «SK-Farmatsııa» JShS-na, 30 myń maska Jambyl oblysy aýmaǵyndaǵy dárihana jelisine jetkizilip jatyr.
Atap aıtqanda, kún saıyn «Jasulan» jáne «Ámir jáne D» dárihana jelisiniń 10 pýnktine jetkizilýde:
1) Tóle bı kóshesi 16;
2) 4-shaǵyn aýdan 29;
3) Abaı kóshesi 134;
4) 12- shaǵyn aýdan 67;
5) Rysqulov kóshesi 32A;
6) 2b teleortalyǵy;
7) Áıteke bı 5A;
8) Ryspek batyr kóshesi 6A;
9) Jeltoqsan kóshesi 237;
10) 9-shaǵyn aýdan 31.
Atalǵan dárihanalardaǵy medıtsınalyq maskanyń quny - 50 teńge. Bir adamǵa 5 danadan artyq satýǵa shekteý qoıylǵan.
Sonymen qatar, oblys ákimdigi Taraz qalasy men aýdandarda tigin sheberhanasy men atelede kóp rettik maska shyǵaratyn shaǵyn óndirister qurý máselesin qarastyrýda. Búgingi tańda olardyń kúnine 3 900 dana ónim shyǵarady.
Sondaı-aq, 18 naýryzda atalǵan dárihana jelilerine dezınfektsııa jáne antıseptık quralynyń 12 túri, onyń ishinde teri antıseptgi, dezınfektsııalyq sabyn sekildi ózge de quraldar túsken.
Aıta keteıik, oblys ákimdigi turǵyndardyń medıtsına buıymdaryna jáne antıseptık quraldaryna qajettiligin qamtamasyz etýge baǵyttalǵan sharalar barysyn jalǵastyrýda. Azamattardy sabyrlyq tanytyp, dúrlikpeýge, jeke gıgıena erejesin saqtaýǵa jáne adamdar jappaı jınalatyn oryndarǵa barmaýǵa shaqyrady.
