Jambyldaǵy sanıtarlyq beketterden 33 myńnan asa jolaýshy ótken

TARAZ. QazAqparat -Jambyl oblysyndaǵy sanıtarlyq–karantındik beketterinde Búginge deıin 33 myńnan astam adam tekseristen ótti,-dep habarlaıdy QazAqparat oblys ákiminiń baspasóz qyzmetine silteme jasap.

19 naýryzdan bastap Jambyl oblysynyń respýblıkalyq mańyzy bar joldarynda sanıtarlyq-karantındik beketter jumys isteı bastady. Onda táýlik boıy kezekshilik uıymdastyrylyp, ondaǵan medıtsına, polıtsııa jáne prokýratýra qyzmetkerleri jumys istep jatyr. Olar jolaýshylardy koronavırýs týraly habardar etip, kólik qozǵalysyn baqylap, turǵyndardyń dene qyzýyn ólsheý jumysyn atqarýda. Basty mindet - óńir halqynyń densaýlyǵyn qorǵaý.

Kún saıyn atalǵan beketter arqyly myńdaǵan adam ótedi. Árbir ótetin adamnyń málimetteri saýalnama arqyly jazylyp, medıtsına qyzmetkerleri teplovızor kómegimen dene qyzýyn ólsheıdi. Aldyn alý beketteri Qyrǵyzstanmen shektesetin Qordaı aýdanynda, Qaraǵandy oblysymen shektesetin Moıynqum aýdanynda, Túrkistan oblysymen shekaralas Jýaly jáne Sarysý aýdandarynda ornalasqan.

Beketterdegi medıtsına qyzmetkerleri avtokólik júrgizýshileriniń jáne jolaýshylardyń densaýlyq jaǵdaıyn tekseredi, aldyn alý sharalaryn júrgizedi, derekter boıynsha saýalnama toltyrady.

Osyndaı sanıtarlyq-karantındik beketter «Aıshabıbi» jáne «Qarasý» shekara mańyndaǵy ótkizý pýnkterinde de jumys isteýde.

24 naýryzdaǵy jaǵdaı boıynsha aldyn alý beketterinde 11 211 avtokólik ótip, 33 409 jolaýshy tekserilgen. Olarǵa 25 563 jadynama men paraqsha taratylǵan.

Óńir turǵyndary men qonaqtary koronavırýstyń aldyn alý jáne taralýyna jol bermeý boıynsha atqarylyp jatqan is-sharalarǵa túsinistik tanytýda.

Búgingi tańda Jambyl oblysy aýmaǵynda koronavırýs ınfektsııasy tirkelgen joq.