Jambyldaǵy polıtsııa ǵımaratynan urlanǵan 6 avtomat tabyldy

NUR-SULTAN. QazAqparat – Qańtar oqıǵasy kezinde Jambyl oblystyq polıtsııa departamentiniń ǵımaratynan urlanǵan qarý-jaraqtar tabyldy. Bul týraly QR ІІM Tergeý departamentiniń bastyǵy Sanjar Ádilov aıtty, dep habarlaıdy QazAqparat tilshisi.

«Jaqynda Taraz qalasynyń turǵyndarynan 6 Kalashnıkov avtomaty tárkilendi. Onyń ishinde bireýi granatalarmen atý úshin jabdyqtalǵan. Budan basqa 4 jabdyqtalǵan oqjatar, dybyssyz atýǵa arnalǵan qurylǵysy bar Makarov tapanshasy men tegis uńǵyly myltyq alyndy. Olar Jambyl oblystyq polıtsııa departamentiniń ǵımaratynan urlanǵan», - dedi Sanjar Ádilov Ortalyq kommýnıkatsııalar qyzmetindegi brıfıng barysynda.

Departament bastyǵynyń dereginshe, 7 qańtarda Almaty-Tashkent avtojolynyń beketinde polıtsııa qyzmetkerleri «Sýbarý» avtokóligin toqtatyp, ishinen 10 birlik ańshy myltyǵyn, bir pnevmatıkalyq tapansha jáne ańshylyq kerek-jaraqtar tapqan. Kólikte bolǵan 5 adamnyń da Jambyl oblysynyń turǵyndary ekendigi jáne Almaty qalasynda bolǵan jappaı tártipsizdikter barysynda ańshy dúkenin tonaýǵa qatysqandary anyqtalǵan.

«Bes kúdikti sottyń sanktsııasymen qamaýǵa alyndy», - dedi ol.

Sonymen qatar ol azamattardyń tártipsizdikter barysynda urlanǵan múlkin izdestirý men tabý jumysy da jalǵasyp jatqanyn aıtty.

«Búgingi tańda polıtsııa organdary azamattardyń somasy 340 mıllıonnan artyq teńgege baǵalanatyn urlanǵan múlkin tapty», - dedi departament bastyǵy.