Jambyldaǵy mektepter tolyǵymen Ashyq-qa qosylǵan
Bul týraly búgin óńirlik kommýnıkatsııalar qyzmeti alańynda ótken brıfıngide oblystaǵy bilim salasynyń sapasyn qamtamasyz etý departamentiniń basshysy Dámesh Óskembaeva aıtyp berdi. Ol jańa oqý jylyna daıyndyq júrgizilý barysyna toqtalyp ótti.
Úkimettiń 11 tamyzdaǵy otyrysy barysynda bıylǵy 2021-2022 oqý jyly dástúrli formatta ótkizý jóninde sheshim qabyldandy. Osyǵan baılanysty jańa oqý jylyna daıyndyq júrgizilip jatyr.
«Oqý jyly 1 qyrkúıekten bastalyp, 34 apta bolady. Jańa oqý jylynda qaýipsizdikti qamtamasyz etý úshin arnaıy sanıtarlyq is-sharalar qabyldanady. Barlyq mektepter, kolledjder men ýnıversıtettegi qyzmetkerler men bilim alýshylar maska kııýge mindetti . Oblysta bilim berý mekemelerindegi qaýipsizdik talaptaryn kúsheıtý boıynsha josparly jumystar júrgizilip jatyr. Bilim berý uıymdaryna azamattardyń koronovırýsqa qarsy statýsyn anyqtaıtyn Ashyq jobasyna 100 paıyz qosyldy»,-dedi D. Óskembaeva.
Oblys mektepterinde qyzmet etetin pedagogtardyń 98,6 paıyzy koronovırýs ekpesin saldyrdy. Jańa oqý jylyna deıin pedagogtardyń 100 paıyzy ekpe alýy qamtamasyz etilse, óńirdegi epıdemıologııalyq ahýaldy eskere otyryp, mektepter dástúrli oqý júıesine kóshedi .
«Shekteýlerdi saqtaı otyryp, balabaqshalarda 20-25 balaǵa deıingi toptarda shtatty rejımde jumys isteýge bolady. Óz kezeginde mektepterdiń barlyq 1-11 synyp oqýshylaryna qatań sanıtarlyq normalardy saqtaı otyryp dástúrli oqytý formatyn júrgizý, sonymen qatar kolledjder men JOO stýdentteri de osy formatta oqytý usynylady. 1 qyrkúıekte bolatyn saltanatty is-shara mektep aýmaǵynda 1 synyp oqýshylary úshin uıymdastyrylady. Olarǵa saltanatty túrde alǵashqy oqýlyǵy «Álippe» tabystalady», - dedi spıker.
