Jambylda jylytý maýsymy bastalǵaly 300-ge jýyq órt bolyp, 14 adam kóz jumǵan
TARAZ. QazAqparat – TARAZ. QazAqparat – Jambyl oblysy ákimdiginde ótken basqosýda órt jáne gazdan ýlaný jaǵdaılarynyń aldyn alý máselesi qaraldy. Aımaqtaǵy tótenshe jaǵdaılardyń osy sanaty boıynsha statıstıka kóńil kónshitpeıdi, dep habarlaıdy QazAqparat tilshisi oblys ákimdiginiń resmı saıtyna silteme jasap.
Oblystyq tótenshe jaǵdaılar departamentiniń basshysy Ermek Mombaevtyń aıtýynsha, jylytý maýsymy bastalǵannan beri óńirde 284 órt tirkelip, 14 adam qaza taýyp, ekeýi jaraqat alǵan.
Úsh adam ýly gazben ýlanǵan desek, 30-dan astam zardap shegýshi qutqarylǵan.
Oblys ákimi tótenshe jaǵdaılar departamenti basshylyǵynan tótenshe jaǵdaılar men jazataıym oqıǵalarǵa ákep soqtyrýy múmkin kemshilikterdiń aldyn alý jumysyn kúsheıtýdi talap etti.
Bul rette turǵyndary qarapaıym qaýipsizdik erejelerine beıjaı qaraıtyn burynǵy saıajaı massıvteri men qalanyń shet jaqtaryndaǵy aýdandarǵa erekshe nazar aýdarý qajettigi aıtyldy.
«Kóbirek broshıýra, paraqsha shyǵaryp, olardy aýyl men qala turǵyndaryna taratyp, profılaktıkalyq túsindirme júrgizý kerek. Bul týyndaǵan jaǵdaılar kezinde ǵana emes, turaqty, júıeli negizde oryndalýy kerek. Ázirge jumys oıdaǵydaı atqarylyp otyrǵan joq desek, osy rette TJ departamentiniń aldyn alý sharalarynyń tıimdiligi týraly aıtýdyń ózi artyq. Ýly jáne tabıǵı gazdyń ıisin anyqtaıtyn datchıkterdi ornatý jumysy is júzinde júrgizilip jatqan joq. Josparlanǵan qurylǵylar sanynyń 10 paıyzy ǵana ornatylǵan», - dep túıindedi aımaq basshysy.
Órttiń aldyn alý jáne gazdan ýlaný jaǵdaılary aǵymdaǵy toqsannyń sońynda oblys ákimdiginiń keńeıtilgen otyrysynda taǵy da jan-jaqty talqylanady.
