Jambylda jylytý maýsymy bastaldy
Bul týraly oblys ákimi Asqar Myrzahmetovtiń tóraǵalyǵymen ótken jıynda aıtyldy.
Aımaq basshysyna oblys ákimdiginiń energetıka jáne turǵyn úı-kommýnaldyq sharýashylyq basqarmasynyń basshysy Nurlan Aldamjarov jylytý maýsymynyń bastalýyna baılanysty atqarylyp jatqan jumystardy baıandady. Onyń aıtýynsha, qazirgi tańda áleýmettik nysandar tolyǵymen jylytýǵa qosylyp, aıaqtalýǵa jaqyn. Al, oblys boıynsha barlyǵy 1593 kópqabatty turǵyn úı bolsa, búginde onyń 1364-i jylytýǵa qosylyp úlgergen. Bul rette aýdandar jospardy 100 paıyz oryndap otyr. Degenmen, Taraz qalasyndaǵy birqatar úılerde keshigýler joq emes.
«Oblys ortalyǵynda barlyǵy 1298 kópqabatty turǵyn úı bar desek, qazirgi tańda 1069 turǵyn úı jylýmen qamtylǵan. Qalǵan 130 úı 22 qazan kúni keshke deıin, 99 úı 25 qazanǵa deıin qosylyp bitedi dep josparlanýda. Bul rette basqarma basshysy onyń sebebin qaladaǵy magıstraldyq qubyrlardyń qaıta jańǵyrtý jumystarynyn bekitilgen kesteden keshigýinen dep túsindirdi. Osy oraıda «M-2» jobasy boıynsha úlken dıametrli qubyrlar Qaraǵandy qalasynan ýaqytyly jetkizilmegendikten, atalǵan materıaldy Reseıden aldyrýǵa májbúr boldy»,- deıdi basqarma basshysy Nurlan Aldamjarov.
Búginde atalǵan jobanyń qurylys jumystary úsh aýysymda júrgizilýde. Ondaǵy jumystardyń bekitilgen kesteden aýytqýyna baılanysty tıisti zańnama aıasynda qatysty mekemelerge shara qabyldanyp, merdiger «Korporatsııa Jılstroı-Taraz» JShS-ne 5 mıllıon teńgeden astam aıyppul qaralǵan.
Sondaı-aq, jıynda kóppáterli turǵyn úılerge jalpy eseptegish quraldaryn ornatý jáne ystyq sý temperatýrasyn saqtalý máseleleri de qozǵaldy. Asqar Isabekuly atalǵan quraldardy ornatarda turǵyndar úshin barlyq tıimdilikterge kóńil bólip, baǵasyn barynsha ońtaılandyrýdyń joldaryn qarastyrýdy tapsyrdy.
