Jambylda jylqysyn izdeýge shyqqan 55 jastaǵy malshy adasyp ketti
TARAZ. QazAqparat – Jambyl oblysy Sarysý aýdanynyń polıtseıleri adasyp ketken malshyny úıine qaıtardy, dep habarlaıdy QazAqparat tilshisi.
Sarysý aýdandyq polıtsııa bólimine Jańatas qalasynyń turǵyny habarlasyp, joǵalǵan jylqysyn izdeýge ketken 55 jastaǵy joldasynyń úıine oralmaǵanyn aıtqan.
Egde kisiniń aıazdy kúni adasyp, úsip qalýy múmkin ekenin oılaǵan polıtseıler shuǵyl túrde izdeý jumysyna kirisedi.
Aýdandyq polıtsııa bólimi basshylyǵynyń tapsyrmasymen bes jol talǵamaıtyn kólik pen 10 polıtsııa qyzmetkerinen turatyn top qurylyp, izdeýge attanǵan. Bul týraly oblystyq polıtsııa departamentiniń baspasóz qyzmeti habarlady.
«Shuǵyl izdestirý sharalarynyń nátıjesinde joǵalǵan jylqysyn izdeımin dep adasyp, astyndaǵy aty ábden qajyp, ózi qatty tońyp qalǵan malshyny polıtseıler túngi saǵat 23.00 shamasynda Shymkent tasjolynyń boıyndaǵy Túrkistan aýyldyq ýchaskesi mańynan tapty. Onyń mal izdep aýyldan alystap ketkeni, baǵdardan aıyrylyp, qaıtar joldy tappaı, adasqany belgili boldy. Polıtsııa qyzmetkerleri ony kólikke otyrǵyzyp, boıyn jylytyp, júrmeı qalǵan atyn júk kóligine salyp, úıine jetkizdi. Azamat medıtsınalyq kómekten bas tartqan» delingen vedomstvo habarlamasynda.
Al osy oqıǵanyń erteńine polıtseıler malshynyń bir kún buryn joǵalǵan jylqysyn izdep taýyp, ıesine qaıtardy.
Shynaıy rıza bolǵan turǵyndar polıtseılerge alǵysyn jetkizdi.
