Jambylda jyl basynan beri 9 adam gazdan ýlanyp ajal qushqan
TARAZ. QazAqparat - Jambyl oblysynda gazdan ýlaný faktileri kóbeıgen, dep habarlaıdy QazAqparat.
2018 jyldyń 9 aıynda oblysta gazdan ýlanýdyń 15 oqıǵasy tirkelse, onyń saldarynan 20 adam japa shegip, 9 adam qaza tapqan. Salystyrmaly túrde aıtsaq, ótken jyldyń esepti kezeńinde osyndaı 12 qaıǵyly oqıǵa tirkelgen edi.
«Bizdiń departament gazdan ýlaný oqıǵalary tirkelgen barlyq mekenjaı boıynsha túsindirý jumystaryn júrgizdi. Soǵan qaramastan, gazdan ýlaný oqıǵalary 25 paıyzǵa, japa shekkenderdiń sany 2 esege, qaza bolǵan adamdar sany 3 esege artyp otyr. Jalpy, 2017-2018 jylytý maýsymy kezinde pesh aqaýlaryna baılanysty oblysta 23 ýlaný deregi tirkelip, sonyń saldarynan 42 adam japa shekse, 9-y kóz jumǵan», - deıdi Jambyl oblystyq TJD órt salasyndaǵy baqylaý jáne profılaktıkalyq qyzmet basqarmasynyń basshysy Maqsat Ákimbaev.
M.Ákimbaevtyń aıtýynsha, basqarma qyzmetkerleri aǵymdaǵy jyldyń tamyz aıynda óńirdegi turǵyndardy jylýmen jáne elektr qýatymen qamtamasyz etetin 87 nysannyń órt qaýipsizdigin tekserip shyqqan. Onyń qorytyndysy boıynsha eki ýchaskede ǵana, atap aıtqanda, «JES» JShS men «Soltústik JJS» mekemesinde órt qaýipsizdigi erejelerin buzý deregi baıqalmaǵan. Qalǵan 85 ýchaskede ereje talaptaryn buzý boıynsha 438 fakti anyqtalǵan. Bul kemshilikterdi joıý úshin olardyń basshylaryna tekserý nátıjeleri boıynsha aktiler berilip, 16 laýazymdy jáne zańdy tulǵaǵa jalpy somasy 579 812 teńge kóleminde aıyppul salynǵan.
Avtor: Ǵıbrat Sembaı
