Jambylda jyl basynan beri 46 jol oqıǵasynda balalar japa shekken
TARAZ. QazAqparat – Jambyl oblysynda jyl basynan beri balalardyń qatysýymen 46 jol-kólik oqıǵasy tirkeldi, - dep habarlaıdy QazAqparat tilshisi.
Jyl basynan beri Jambyl oblysynda balalardyń qatysýymen 46 jol-kólik oqıǵasy oryn aldy. Nátıjesinde 50 kámeletke tolmaǵan jasóspirim túrli dene jaraqatyn aldy, ekeýi qaıtys bolǵan. Sondaı-aq, Tarazda jas velosıpedshilerdiń qatysýymen bir jol-kólik oqıǵasy tirkelip, bir bala zardap shekken.
Jambyl oblysynyń Polıtsııa departamenti balalardy muqııat qadaǵalap, olardyń avtomobılder men mototsıklderdiń kiltterine qol jetkizý múmkindigin boldyrmaýǵa, skýterdi júrgizýge tıisti quqyqsyz jáne júrgizý daǵdylarynsyz tyıym salýǵa jol qozǵalysynyń eresek qatysýshylarynyń nazaryn aýdarady.
«Balaǵa avtokólikti nemese motokólikti basqarýda beıǵamdyǵy nege ákep soǵatynyn túsindirý mańyzdy. Sonymen qatar, jaıaý júrginshi balalar joldardaǵy jol-kólik oqıǵasyna jıi qatysýshy da bolady.
Avtojol bóliginen ótken kezde jol erejelerin saqtamaı, gadjetter men qulaqqaptardy paıdalanyp, sondaı-aq jol qozǵalysy erejelerin buzatyn eresek jaıaý júrginshilerdiń salǵyrttyǵy da jazataıym oqıǵalardyń sebepteri bolyp tabylady. Balalarmen jol-kólik oqıǵalarynyń aldyn-alýda jetken nátıjeler kóbinese eresekterdiń sanasyna, jeke mádenıeti men tártibine baılanysty»,-delingen oblystyq polıtsııa departamentiniń baspasóz qyzmetiniń habarlamasynda.
