Jambylda jyl basynan beri 30-dan astam adamdy kene shaqqan
TARAZ. QazAqparat – Jambyl oblysynda jyl basynan beri keneniń shaǵýynan zardap shekken 34 adam medıtsınalyq kómekke júgingen,- dep habarlaıdy QazAqparat tilshisi.
Kúnniń ysýymen birge kongo-qyrym gemorragııalyq qyzbasy aýrýynyń týyndaýyna sebep bolatyn keneler uıqydan oıanyp, ashyq aspan astynda, tabıǵat aıasynda júrgen adamdarǵa shabýyl jasaı bastaıdy.
Kongo-qyrym gemorragııalyq qyzbasy – jedel vırýstyq tabıǵı oshaqtyq aýrý, ol ıksod keneleri arqyly beriledi.
Jalpy, Jambyl oblystyq densaýlyq saqtaý basqarmasynyń málimetinshe, óńirde 48 eldi meken qyrym qandy bezgeginiń tabıǵı oshaǵy bolyp esepteledi.
Jyl basynan beri ýly jándiktiń shaǵýynan zardap shekken 34 adam medıtsınalyq kómekke júgingen.
Onyń ishinde 15-i - balalar, bul ótken jyldyń sáıkes kezeńimen salystyrǵanda 2 ese az.
Naqtyraq, aıtsaq, Taraz qalasynyń aýmaǵynda – 11, Baızaq aýdanynda – 10, Jambyl, Qordaı, Merki, T.Rysqulov jáne Shý aýdandarynda eki jaǵdaıdan, Moıynqum jáne Sarysý aýdandarynda bir jaǵdaıdan anyqtalǵan.
«Kene shaǵýdan zardap shekkenderdiń barlyǵy 14 kúnge medıtsınalyq baqylaýǵa alyndy, merzimi ótkennen keıin 17 adam baqylaýdan alyndy. Bıyl Kongo-Qyrym gemorragııalyq qyzbasyn rastaıtyn jaǵdaılar tirkelgen joq. Aýrýdyń deńgeıin tómendetý, epıdemııalyq ahýaldy kúrdelendirmeý, dertti der kezinde anyqtap, qaterli jaǵdaıǵa jibermeı ustap turý sharalaryn júrgizý – tek qana medıtsına, veterınarııa qyzmetkerleriniń nemese jergilikti ákimshilikterdiń jumystary ǵana emes, oǵan oshaq aımaqtarynda turatyn eldi mekenderdiń turǵyndary da at salysýǵa tıis» delingen densaýlyq saqtaý basqarmasy baspasóz qyzmetiniń habarlamasynda.
