Jambylda jyl basynan beri 28 brakonerlik fakti tirkelgen
TARAZ. QazAqparat – Jambyl oblysynda jyl basynan beri ań aýlaý talaptaryn buzýdyń 28 faktisi tirkelgen. Ótken jyldyń osy kezeńimen salystyrǵanda bul kórsetkish eki esege kemigen,- dep habarlaıdy QazAqparat tilshisi.
Bul oraıda mamandar saıatshylyq quratyndardyń jaýapkershiligi artyp, brokonerlerdiń sany azaıǵanyn aıtady.
«Qazir ańshylyq úshin bar jaǵdaı jasalǵan. Onyń ústine ereje buzýshylar da kúrt tómendegen. Aımaqta búginde arnaıy 42 sharýashylyq jumys isteıdi. Jergilikti ańshylardan bólek Almaty, Túrkistan oblystarynan kelýshiler sol jerlerde saıatshylyq quryp, ań atady. Árqaısysynyń áreketteri ınpektorlardyń jiti qadaǵalaýynda», - deıdi oblystyq orman jáne ańshylyq sharýashylyq aýmaqtyq ınspektsııasy basshysynyń orynbasary Talǵat Toǵyzbaev.
Mamandardyń pikirinshe brakonerlikti joıyp, baqylaýdy kúsheıtýde materıaldyq-tehnıkalyq bazany jańartý basty másele. Búginde ınspektsııa ınspektorlary zań buzýshylyqty tirkeıtin beınekameralar, áýeden barlaý jasaıtyn drondar jáne qosymsha kólikterge zárý.
«Aǵymdaǵy jyl basynan bergi aralyqta ańshylyq erejesin buzý boıynsha óńirde 28 derek tirkelgen. Basym bóligi ańshylyq merzimin buzýǵa qatysty. Resmı alatyn bolsaq, qazirgi tańda oblys boıynsha 5 myńdaı ańshy bar. Astyrtyn túrde zańnan tys ańǵa shyǵatyndar bar. Olardyń deni jergilikti turǵyndar. Kimde-kim joldamalarda kórsetilgen qaǵıdalardy eskermese, aıyppulmen jazalanady»,-deıdi T.Toǵyzbaev.
