Jambylda jyl basynan beri 140-tan astam kólik órtengen
TARAZ. QazAqparat – Jambyl oblysynda aǵymdaǵy jyl basynan beri 140-tan astam kólik órtengen, - dep habarlaıdy QazAqparat tilshisi.
Bıyl oblys aýmaǵynda barlyǵy 142 avtokóliktiń órtený oqıǵasy tirkelgen. Olardyń saldarynan bolǵan materıaldyq shyǵyn 17 mıllıon 599 myń tengeni qurady. Dese de, bul kórsetkish ótken jylmen salystyrǵanda 6,6 paıyzǵa kemigenin kórsetedi. Atap aıtsaq, byltyr avtokólikterdiń 152 órti esepke alynyp, 24 mıllıon 345 myń teńge shyǵyn belgilengen.
Mamandar órtterdiń shyǵý sebepteri ártúrli, elektr júıesiniń zaqymdanýynan janarmaı júıesiniń aqaýyna deıin ekendigin basa aıtyp otyr.
«Ótken aıdyń sońǵynda oblys aýmaǵynda 4 avtokóliktiń órtený oqıǵalary tirkeldi. Naqtyraq aıtsaq, 26 qarasha kúni Taraz qalasynda 1992 jylǵy «Audi-100» markaly avtokóliginiń jáne 1988 jylǵy «Volkswagen Passat» markaly avtokóliginiń motor bóligi órtendi. Sol kúni Shý aýdany, Shý qalasy, «Sahzavod» móltek aýdanynda da 1985 jylǵy «Audi-100» markaly avtokóliginiń motor bóliginde órt boldy. Al, kelesi kúni Shý aýdany, Tóle bı aýylynyń kire berisinde «Audi-100» markaly avtokóligi órtendi. Osy oraıda órtterdiń shyǵý sebepteri olardyń paıdalaný ýaqyttarymen tikeleı baılanysty bolyp otyrǵandyǵyn aıtqym keledi»,- deıdi oblystyq TJD Zilzalalardyń qaýip-qaterin azaıtý jáne azamattyq qorǵaý salasyndaǵy baqylaý basqarmasynyń bas mamany, podpolkovnık Baýyrjan Seıdalıev.
Sondaı-aq, ol kóbine eski avtokólikter, paıdalaný ýaqyty on jyldan asqandar jıi janatynyn jetkizdi. Maı tamshysynyń áserinen janý oqıǵalary az emestigine nazar aýdartqan ol júrgizýshilerdi kólikterin barynsha baqylap, saq bolýǵa shaqyrdy.
