Jambylda jyl basynan beri 124 medıtsına qyzmetkeri KVI juqtyrǵan
TARAZ. QazAqparat – Jambyl oblysynyń ákimi Berdibek Saparbaevtyń tóraǵalyǵymen ótken keńeste densaýlyq saqtaý salasyndaǵy aǵymdaǵy jyldyń birinshi toqsanynda atqarylǵan jumystardyń qorytyndysy qaraldy, dep habarlaıdy QazAqparat tilshisi.
Búgingi tańda sala úsh mindet pen toǵyz baǵytty qamtıtyn 2020-2025 jyldarǵa arnalǵan baǵdarlama boıynsha alǵa jyljýda. Oblystyq densaýlyq saqtaý basqarmasynyń basshysy Áset Qalıevtiń aıtýynsha, belgilengen 20 ındıkatordyń úsheýine qol jetkizilmegen.
1000 turǵynǵa shaqqanda bala týý kórsetkishi 10,7-den 11,8-ge deıin ósken. Rak, onyń ishinde qaterli isikter, arterııalyq gıpertonııa, mıokard ınfarktisi, tynys alý joldarynyń aýrýlarynan bolatyn ólim-jitim kórsetkishteri tómendegen.
Oblys aýmaǵynda tórt ozyq medıtsınalyq tehnologııalar ortalyǵyn qurý josparlanýda. QR Prezıdentiniń tapsyrmasyna sáıkes, 2023 jylǵa deıin árbir eldi meken densaýlyq saqtaý mekemesimen qamtylýy tıis. Sondyqtan jaqyn arada 60 aýylda osyndaı nysan salynyp, 32 nysan kúrdeli jóndeýden ótkizilmek.
Jambyldyqtar em alý úshin áli de basqa aımaqtarǵa baryp jatady. Aıtalyq, jyl basynan beri 1932 adam oblystan tys jerlerde emdelýge sheshim qabyldaǵan. Olar negizinen onkologııalyq jáne hırýrgııalyq aralasýdy qajet etetin ýrologııalyq patologııasy bar naýqastar men taǵy basqalar. Mamandar tapshylyǵy jáne joǵary tehnologııalyq jabdyqtarmen qamtamasyz etý máseleleri sheshilgen jaǵdaıda, bul aǵyndy kem degende eki esege azaıtýǵa múmkindik bolar edi.
Eki ortalyq aýdandyq aýrýhanada kompıýterlik tomograftar ornatylsa, bıyl mundaı qurylǵylar taǵy úsh OAA-ǵa qoıylmaq. Aǵymdaǵy jyldyń sońyna deıin jergilikti mekemelerdiń «Farmatsııa» SK aldyndaǵy qaryz máselesi sheshiletin bolady. Kadr máselesin joıý úshin S.D.Asfendııarov atyndaǵy medıtsınalyq ýnıversıtetimen birlesken úsh jyldyq baǵdarlama ázirlengen.
Sanıtarlyq-epıdemıologııalyq baqylaý departamentiniń basshysy Baıdildá Shynálıev habarlaǵandaı, 1 qańtar men 28 sáýir aralyǵynda KVI dertin 124 medıtsına qyzmetkeri juqtyrǵan. Medıtsına qyzmetkerleriniń arasynda aýrýlardyń eń kóp deregi Taraz qalasynda – 71, Jýaly – 11, Baızaq – 10 naýqas tirkelgen.
Medıtsınalyq qyzmetkerler arasynda KVI jaǵdaılarynyń tirkelýi boıynsha 12 jospardan tys tekserý júrgizilip, 393,7 myń teńge somasyna toǵyz aıyppul salynyp, jeti uıǵarym berildi.
«Dárigerlerdiń jetispeýshiligi máselesin sheshý úshin medıtsınalyq ýnıversıtetpen tyǵyz baılanysta jumys isteý, JOO-nyń jergilikti fılıalynyń qyzmetin damytý qajet. «Farmatsııa» SK aldyndaǵy bereshek máselesin sheshý kerek. Oblystyń barlyq turǵyndary medıtsınalyq saqtandyrý júıesimen qamtylýy tıis. Medıtsınalyq uıymdardyń basshylary ujymdaǵy moraldyq-psıhologııalyq ahýalǵa nazar aýdarýy mańyzdy, óıtkeni shaǵymdar sany artyp otyr. Halyqty vaktsınatsııalaý belgilengen merzimde júrgizilýi kerek. Telemedıtsınany damytý – ýaqyt talaby, Ońtústik Koreıa, Izraıl jáne basqa da densaýlyq saqtaý salasy damyǵan eldermen yntymaqtastyq ornatý qajet», - dep túıindedi Berdibek Saparbaev.
