Jambylda joldarǵa jaýapty 190 laýazymdy tulǵa jaýapkershilikke tartyldy
TARAZ. QazAqparat – Jambyl polıtseıleri avtokólik joldaryn qanaǵattanarlyqsyz ustaǵany úshin 190 laýazymdy tulǵany ákimshilik jaýapkershilikke tartty, dep habarlaıdy QazAqparat tilshisi.
Jyl saıyn 1 qyrkúıekten 1 qarashaǵa deıin Jambyl oblysy Polıtsııa departamenti Ákimshilik polıtsııa basqarmasy jol jáne tehnıkalyq ınspektsııasynyń qyzmetkerleri múddeli qyzmettermen birlesip avtomobıl joldaryna keshendi kúzgi tekserý júrgizedi.
Jol qozǵalysy qaýipsizdigin qamtamasyz etý maqsatynda Jambyl oblysy PD qyzmetkerleri 7-20 qazan aralyǵynda Jambyl oblysy ákimdiginiń jolaýshylar kóligi jáne avtomobıl joldary basqarmasy jáne «Jol aktıvteriniń ulttyq sapa ortalyǵy», «QazAvtoJol» kompanııasynyń jáne «Qazaqavtojoldyń» oblystyq fılıalynyń ókilderimen birlesip, oblys aýmaǵyn qamtıtyn oblystyq (1 941,93 shaqyrym) jáne respýblıkalyq (1 196 shaqyrym) mańyzy bar avtomobıl joldaryn keshendi tekseristen ótkizdi.
«Tekserý barysynda oblystyq mańyzy bar joldarda 639 kemshilik, respýblıkalyq mańyzy bar joldarda 762 kemshilik - jol belgileriniń bolmaýy jáne standart talaptaryna sáıkes kelmeýi, asfaltbeton jabynynyń buzylýy, shuńqyrlar anyqtaldy. Kúzgi keshendi tekseris qorytyndysy boıynsha, Jambyl oblysy ákimdiginiń jolaýshylar kóligi jáne avtomobıl joldary basqarmasyna anyqtalǵan kemshilikterdi joıý boıynsha 37 jazbasha nusqama, al «QazAvtoJol» UK AQ-nyń Jambyl oblystyq fılıalyna 12 nusqama berildi», - dedi Jambyl oblysy PD ÁPB bastyǵy Jaıdarbek Quttybaev.
Oblystyq jáne respýblıkalyq mańyzy bar avtomobıl joldaryn kútip ustamaǵany jáne jol qozǵalysy qaýipsizdigin qamtamasyz etpegeni úshin atalǵan joldarǵa jaýapty merdiger uıymdardyń 12 laýazymdy tulǵasy QR ÁQBtK-niń 631-baby 1-bóligine sáıkes ákimshilik jaýapkershilikke tartyldy. Bıylǵy jyldyń toǵyz aıynda jalpy oblys boıynsha joldardy qanaǵattanarlyqsyz ustaǵany úshin 190 laýazymdy tulǵa ákimshilik jaýapkershilikke tartylǵan.
