Jambylda joldardaǵy kemshilikke baılanysty 173 laýazymdy tulǵa jaýapkershilikke tartyldy
TARAZ. QazAqparat – Jol qozǵalysy qaýipsizdigin qamtamasyz etý maqsatynda jyl basynan beri Jambyl oblysyndaǵy 18,6 myń shaqyrym jolda 1 619 tekserý júrgizildi, dep habarlaıdy QazAqparat tilshisi.
Shara barysynda oblystyń avtojoldarynda 11 746 aqaý, onyń ishinde respýblıkalyq mańyzy bar joldarda 2 265, oblystyq mańyzy bar joldarda 2 877, aýdandyq mańyzy bar joldarda 923, eldi mekenderdiń kóshelerinde 5 666 jáne sharýashylyq mańyzy bar joldarda 15 kemshilik anyqtalǵan.
«Tekserý nátıjesi boıynsha jol mekemeleriniń basshylaryna 1 619 uıǵarym jiberildi. Avtomobıl joldaryn kútip ustaýdaǵy kemshilikke qatysty 235 aqparat joldandy, onyń 147 - si jergilikti atqarýshy organdarǵa jiberildi», - dep habarlady Jambyl oblysynyń PD ÁPB jol jáne tehnıkalyq ınspektsııa bóliminiń bastyǵy Erjan Mananbaev.
Avtomobıl joldaryn qanaǵattanarlyqsyz ustaǵany jáne jol qozǵalysy qaýipsizdigin qamtamasyz etpegeni úshin 173 laýazymdy tulǵa ákimshilik jaýapkershilikke tartylǵan.
«QR ÁQBtK-niń 631-baby 1-bóligi boıynsha joldarda jumys júrgizý, joldardy, temirjol ótkelderin jáne basqa da jol qurylystaryn kútip ustaý jónindegi talaptardy oryndamaǵany úshin 136 laýazymdy tulǵa ákimshilik jaýapkershilikke tartyldy. Taǵy 3 laýazymdy tulǵaǵa qatysty jol-kólik oqıǵasyna ákep soqqan uqsas quqyq buzýshylyq jasaǵany úshin ákimshilik hattamalar jasaldy. Joldardy, temirjol ótkelderin jáne basqa da qurylystardy nemese jol júrisin retteýdiń tehnıkalyq quraldaryn búldirgeni úshin 34 jeke tulǵa ákimshilik jaýapkershilikke tartyldy», - dep túıindedi sózin Erjan Mananbaev.
