Jambylda jol-kólik oqıǵasyn azaıtýdyń erekshe tásili engizildi
TARAZ. QazAqparat – Jambyldyq polıtseıler jol-kólik oqıǵalarynyń aldyn alýdyń jańa tásilderin engizýde ,- dep habarlaıdy QazAqparat tilshisi.
Oblys polıtseıleri óńirdiń qozǵalysy kóp avtojoldaryna «3D» formattaǵy arnaıy qyzmettik mashınalardyń maketin qoıyp, kezekti jańa eksperıment jasaýda. Synaq retinde ornatylǵan maket qozǵalys qaýipsizdiginiń jáne jol-kólik oqıǵalarynyń aldyn alýǵa óz áserin tıgizedi dep kútilýde.
«Polıtsııanyń kóligin» kórgen júrgizýshiler birden jyldamdyqty tómendetip, qaýipsizdik beldigin taǵyp, jol qozǵalysynyń barlyq erejelerin muqııat oryndaıdy. Synaqtyń birinshi kúninde-aq tártip saqshylary jańalyqtyń jaqsy nátıjelerin baıqady. Maketter qoıylǵan kólik kóp júretin joldarda birde-bir jol erejesin buzý jaǵdaıy tirkelgen joq»,-dedi oblystyq Polıtsııa departamenti baspasóz qyzmetiniń jetekshisi Gúlsara Muhtarqulova.
Eksperıment sátti aıaqtalǵan kezde kólikter eń kóp júretin óńirdiń tas joldarynda jáne JKO jıi bolatyn joldarda ornatylatyn maketterdiń sanyn arttyrý josparlanýda eken.
Aıta keteıik, budan bólek, patrýldik polıtsııa avtokólikteriniń mýlıajdarynan bólek, respýblıkalyq mańyzy bar joldardyń 50 ýchaskesinde júrgizýshiniń rólde uıyqtap ketýiniń aldyn alý maqsatynda «shýly» jolaqtar ornatylǵan.
