Jambylda jol apatynan ádilet basqarmasynyń basshysy kóz jumdy
TARAZ. QazAqparat - Batys Eýropa-Batys Qytaı halyqaralyq tas jolynda iri jol apaty boldy, dep habarlaıdy QazAqparat tilshisi.
Belgili bolǵandaı, atalmysh jol-kólik oqıǵasynda Taraz qalalyq ádilet basqarmasynyń basshysy Gúlnar Kóshekova qaza tapqan.
«23 qarasha kúni keshkisin Batys Eýropa-Batys Qytaı avtojolynyń 566-shaqyrymynda jol-kólik oqıǵasy oryn aldy. Taraz qalasynan Túrkistan oblysyna qaraı jolǵa shyqqan «Mersedes-Bents» avtokóliginiń júrgizýshisi rólge ıe bola almaı, mashına aýdarylyp qalǵan», - dedi Jambyl oblystyq polıtsııa departamentiniń baspasóz qyzmetinen.
Jol apaty saldarynan júrgizýshi men eki jolaýshy Jýaly aýdandyq ortalyq aýrýhanasynyń jansaqtaý bólimshesinde jantásilim etti. Taǵy bir jolaýshy oblys ortalyǵyndaǵy №1 qalalyq aýrýhanaǵa jatqyzylǵan.
Іs boıynsha birqatar saraptamalar taǵaıyndaldy. QR Qylmystyq kodeksiniń 345-baby, 4-bólimi boıynsha sotqa deıingi tergeý júrip jatyr. Polıtseıler tergeý aıaqtalǵansha istiń egjeı-tegjeıi aıtylmaıtynyn atap ótti.
