Jambylda jerjańǵaq ósirilýde
TARAZ. QazAqparat – Jambyldyq sharýalar ekzotıkalyq ósimdik – jerjańǵaq ósirýdi qolǵa aldy, dep habarlaıdy QazAqparat tilshisi.
Óńirdegi sharýalar burshaq tuqymdasyna jatatyn maıly daqyldy ósirý isine shyndap kirisken. Solardyń biri Talas aýdanyndaǵy «Beken» sharýa qojalyǵy.
Mal sharýashylyǵy jáne eginshilikpen qatar aınalysyp otyrǵan sharýa qojalyǵy qyzylsha, kartop, sábiz, pııazben qatar jerjańǵaq ósirýdi qolǵa aldy. Bıyl alǵash ret synama retinde eki gektar aýmaqqa jerjańǵaq ósirýdi bastaǵan qojalyq ıesi Nurjappar Isahmetov bul daqyl kólemin keler jyldan bastap keńeıtýge nıettenip otyr. Ol tuqymdy Ózbekstan jáne Qytaı elderinen ákelgen.
«Ońtústik Amerıkada keń tanymal ósimdik Qazaqstanǵa XVIII ǵasyrdyń sońynda jetkizilgen. Degenmen ony egý elimizde endi ǵana jolǵa qoıylýda. Daqyl asa bir kútimdi qajet etpeıdi. Eń bastysy jer ylǵaldy, kún raıy jyly bolsa boldy. Al, sabaǵy men japyraǵy malǵa taptyrmas azyq. Tıimdiligi sol, bul da basqa burshaq tuqymdastary sııaqty jerdi qunarlandyrady. Bile bilgen adamǵa jerjańǵaqtan paıda kól-kósir. Suranys joǵary. Tókken ter esh ketpeıdi», – deıdi N.Isahmetov.
Qazirgi ýaqytta egistik alqapta jerjańǵaq japyraq jaıyp, jaıqalyp ósip tur. Ol 120 kúnde pisip-jetiledi. Sáýir aıynda ekken jerjańǵaqty sharýalar jıyrma kúnnen soń jınaımyz dep otyr. Ónim naryqta úlken suranysqa ıe bolǵandyqtan, óndiristik kooperatıv jetekshisi jerjańǵaqtyń jerde qalmaıtynyna nyq senimdi.
Jýyrda ǵana aýdanǵa jumys saparymen arnaıy kelgen oblys basshysy Asqar Myrzahmetov atalǵan qurylymnyń jumysymen tanysyp, jerjańǵaq ósirýdiń shyǵyny men tabysyn zerdelep, ony óńir aýmaǵynda keń kólemde qolǵa alý kerektigin basa aıtqan bolatyn.
Aıta ketý kerek, oblystaǵy ózge de «Samǵaý», «Anar-1» sharýa qojalyqtary jerjańǵaq ósirýmen aınalysýda.
