Jambylda jeńil ónerkásipti damytý jolǵa qoıylmaq
TARAZ. QazAqparat – Jambyl oblysynda jeńil ónerkásipti damytý boıynsha keshendi sharalar qolǵa alynbaq. Ol boıynsha tıisti zerdeleý júmystary júrgizilip, naqty qadamdarǵa negizdelgen jumys jospary qurylmaq. Búgin oblys ákimdiginde ótken keńeste oblystaǵy atalǵan salany damytý máseleleri talqylandy, dep habarlaıdy QazAqparat.
Aımaq basshysy Asqar Myrzahmetovtyń tóraǵalyǵymen ótken jıynǵa jaýapty tulǵalar men birqatar kásipkerler qatysty.
Aıta keteıik, jeńil ónerkásip salasynda ótken jyly óńirde 3,4 mıllıard teńgeniń ónimi óndirilse, aǵymdaǵy jyldyń on aıynda ol kórsetkish 2,2 mıllıard teńgeni quraǵan. Bul oraıda óndirilgen ónimniń basym bóligi «Taraz bylǵary aıaq kıim» JShS-ine tıesili. Atalǵan kásiporyn ótken jyly jalpy shyǵarylǵan ónimniń 55 paıyzyn óndirgen. Sondaı-aq, bul turǵydaǵy sheteldik ımporttyń kólemi 3,8 mıllıard teńgege teń.
Basqosý barysynda salaǵa serpin berip, tirkelgen kásiporyndardyń júktemesin kúsheıtýge kedergi bolyp otyrǵan birqatar jaıttar nazarǵa alyndy. Aıtalyq, arnaıy sertıfıkat alý, sertıfıkaty alýdaǵy saraptama qunynyń qymbattyǵy, kadr tapyshylyǵy, shıkizattyń jetispeýi, tehnıkalardyń tozýy sekildi máseleler bul baǵytta qoldaýdyń kerektigin baıqatty. Asqar Isabekuly osyǵan aıryqsha nazar aýdaryp, jergilikti jáne otandyq taýar óndirýshilerdiń múddesin qorǵaý jolynda naqty sheshimder qabyldaý kerektigine kóńil bóldi. Sertıfıkattandyrý sharalaryn jeńildetýge, suranysty jergilikti kásiporyndar qala berdi otandyq taýar óndirýshilerdiń tarapynan qanaǵattandyrýdyń mańyzdylyǵyna toqtaldy. Ol úshin jaýapty tulǵalarǵa qoldaýdyń bar tetikterin qarastyrýdy, kelisimshart talaptaryn qaıta naqtylaýdy tapsyrdy.
Jıynda birqatar kásiporyn basshylary óz kásipterin keńeıtý úshin kezdesip otyrǵan túıindi túıtkilderin toqtalyp, oramdy oı-pikirlerin ortaǵa saldy. Olardyń deni kadr tapshylyǵy men jer máselesin aldyǵa tartty. Óńir basshysy olardy sheshý boıynsha tıisti tulǵalarǵa hattamalyq tapsyrmalar júktep, baqylaýda bolatynyn basa aıtty.
