Jambylda jemqorlyqty júgendeıtin tyń joba qolǵa alyndy

TARAZ. QazAqparat - Jambyl oblysynda «Adaldyq alańy» jobasy aıasynda halyqqa kórsetiletin memlekettik qyzmetter elektrondyq júıege kóshirilip jatyr. Bul baǵytta óńirde «Dıdjıtal Agent» jobasy bastaldy, dep habarlaıdy QazAqparat.

Tyń bastama turǵyndarǵa kórsetiletin qyzmetterdi ońtaılandyryp, sapasy men qoǵamdyq baqylaýdy kúsheıtýge baǵyttalǵan.

«Zań júzinde árbir shaǵymnyń qaralý merzimi 15 kúnge deıin baratyn bolsa, osy «Dıdjıtal Agent» arqyly biz árbir shaǵymdy bir kúnniń ishinde qarastyramyz. Bul jerde turmystyq sybaılas jemqorlyqty joıýmen qatar, qoǵamnyń ómir sapasyn kóterýge baǵyttalǵan is-sharalar atqarylady», - deıdi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblys boıynsha departamentiniń basshysy Ravıl Tólebaev.

Sondaı-aq ol jańa joba arqyly árbir azamat ózine kórsetilgen qyzmetke baǵa berip, qanaǵattanbaǵan jaǵdaıda shaǵym túsirip, der kezinde jaýap alýǵa múmkindik týyp otyrǵanyn aıtady.

Aıta ketý kerek, ótken jyly aımaqta mobıldi qosymsha arqyly turǵyndardan 200-ge jýyq shaǵym túsip, tıisti jaýap berilgen. Mamandardyń aıtýynsha, oblysta kóbine Halyqqa qyzmet kórsetý ortalyqtaryna qatysty shaǵym jıi túsedi.