Jambylda jemqorlyqty habarlaǵan jıyrma adam 2,8 mıllıon teńge aldy

TARAZ. QazAqparat – Jambyl oblysynda jemqorlyq baǵyttaryn anyqtaý jumystary kúsheıtilgen, dep habarlaıdy QazAqparat tilshisi.

​QR Sybaılas jemqorlyqqa qarsy is-qımyl agenttiginiń Jambyl oblysy boıynsha departamentiniń basshysy Ádilhan Áshirbaevtyń aıtýynsha, bıyl óńirde 6 júıeli sybaılas jemqorlyq faktisi anyqtalǵan.

​«Bıylǵy jyldyń toǵyz aıynda 6 júıeli sybaılas jemqorlyq, shaǵyn jáne orta bıznes jumysyna aralasýdyń 14 faktisi, laýazymdy tulǵalar tarapynan kóleńkeli ekonomıka sýbektilerine qamqorlyq jasaýdyń 7 jáne memlekettik baǵdarlamalardy iske asyrýǵa bólingen bıýdjettik qarajatty urlaýdyń 14 faktisi tirkeldi. Barlyq jaǵdaıda ótken jylǵa qaraǵanda kórsetkishterde ósim baıqalady»,- deıdi atalǵan departament basshysy.

​Ádilhan Áshirbaev atap ótkendeı, tirkelgen qylmystar sany boıynsha memlekettik organdar arasynda kóshbasshylar jergilikti atqarýshy bılik organdary boldy. Jyl basynan beri sotqa 93 qylmystyq is jiberilse, 89 adam qylmystyq jaýapkershilikke tartylǵan. Máselen, qylmystyq ister boıynsha keltirilgen shyǵyn kólemi 1,4 mıllıard teńgeni qurasa, onyń 975 mıllıon teńgesi ótelip, 122,3 mıllıon teńgeniń múlkine shekteý salynypty.

​«Sybaılas jemqorlyq quqyq buzýshylyq faktileri týraly habarlaǵan tulǵalarmen profılaktıkalyq jumystar turaqty túrde júrgiziledi. Esepti kezeńde jalpy somasy 2,8 mıllıon teńgemen 20 adam marapattalǵan. Kezekti ret qoǵamdy sybaılas jemqorlyq kórinisterinen tys qalmaýǵa shaqyrǵym keledi. Sybaılas jemqorlyq qylmystar týraly bizge habarlaı otyryp, siz sybaılas jemqorlyqqa qarsy is - qımyl isinde azamattyq paryzyńyzdy oryndap qana qoımaı, sondaı-aq zańdy negizde aqshalaı yntalandyrýǵa sene alasyz», - dep atap ótti Ádilhan Áshirbaev.