Jambylda jemqorlyq boıynsha jaýapqa tartylǵan 9 basshy qyzmetin jalǵastyryp kelgen
Atalǵan tulǵalar tek sybaılas jemqorlyqqa qarsy qyzmettiń aralasýynan keıin ǵana óz ókilettigin doǵarýǵa májbúr bolǵan. Bul týraly eńbek jáne sybaılas jemqorlyq zańnamasynyń oryndalýy boıynsha monıtorıng barysynda anyqtalǵan.
Jambyl oblysy ákimi Berdibek Saparbaevtyń tóraǵalyǵymen ótken sybaılas jemqorlyqqa qarsy is-qımyl jónindegi komıssııanyń otyrysynda 2019 jyly jáne aǵymdaǵy jyldyń alǵashqy úsh aıynda atqarylǵan jumystardyń qorytyndysy saralandy.
- 2019 jyly Jambyl oblysy boıynsha sybaılas jemqorlyq qylmystary úshin 33 laýazymdy tulǵa sottalsa, olardyń basym bóligi bilim salasyna qatysty. Basqa salalardan da sybaılas jemqorlyqqa qarsy zańnamany buzýshylar bar. Eń kóp qylmys Taraz qalasynda, Shý, Baızaq, Jýaly jáne Merki aýdandarynda bolǵan, - dep atap ótti oblys ákimi jıynnyń alǵy sózinde.
Kún tártibindegi ózekti taqyryp boıynsha tolyq aqparatty Sybaılas jemqorlyqqa qarsy is-qımyl agenttiginiń oblystyq departamentiniń basshysy Ádilhan Áshirbaev baıandady.
- Ótken jyldyń qorytyndysy boıynsha departament sotqa sybaılas jemqorlyq sıpatyndaǵy 70 is joldasa, 90 laýazymdy tulǵa qylmystyq jaýapqa tartylǵan.
Sybaılas jemqorlyq qylmystarynan keltirilgen shyǵyn kólemi 1,2 mıllıard teńgeni qurap, 930 mıllıon teńge memleketke qaıtaryldy. Shaǵyn jáne orta bıznes qyzmetine aralasýmen, sondaı - aq memlekettik baǵdarlamalardy iske asyrýǵa bólingen qarajatty jymqyrýǵa qatysty qylmystardyń sany artqan, - dep atap ótti A. Áshirbaev.
Anyqtalǵandaı, memlekettik qurylymdar arasynda jergilikti atqarýshy organdar sybaılas jemqorlyqqa asa beıim. Ásirese, bilim berý, densaýlyq saqtaý, áleýmettik qorǵaý, aýyl sharýashylyǵy, qurylys, energetıka jáne turǵyn úı kommýnaldyq sharýashylyq salalarynda zańbuzýshylyqqa jıi jol berilýde. Sonymen qatar, jıynda quqyq qorǵaý organdarynyń qyzmetkerlerine qarsy ótken jyly 29 qylmystyq is qozǵalǵandyǵy da aıtyldy.
Aǵymdaǵy jyldyń úsh aıynda sotqa joldanǵan sybaılas jemqorlyq sıpatyndaǵy qylmystyq isterdiń sany 27-ge jetse, osy bólik boıynsha 28 tulǵa qylmystyq jaýapqa tartylǵan.
Baıandamashy oblys kóleminde sybaılas jemqorlyqqa qarsy is-qımyl jónindegi 2020 jylǵa arnalǵan keshendi jospardy iske asyrýǵa baılanysty birqatar usynysyn ortaǵa saldy.
Ol jergilikti atqarýshy organdardyń mańyzdy mindeti «Halyq únine qulaq asatyn memleket» tujyrymdamasyn iske asyrý sheńberinde halyqpen tıimdi keri baılanys ornatý bolyp tabylatyndyǵyna aıryqsha kóńil bóldi. Sońǵy ýaqytta «Adaldyq alany» jobalyq keńsesiniń jumysynda oń tájirıbe jınaqtalǵandyǵyn, osy baǵyttaǵy jumystardy odan ári jalǵastyrý kerektigi aıtyldy.
Basqosýda «Jambyl – adaldyq alańy» jobalyq keńsesiniń jumysy men perspektıvalyq baǵyttary týraly atalǵan jobanyń jetekshisi Nazıma Jubandyqova baıandady.
Jıyndy qorytyndylaı kele Berdibek Saparbaev aǵymdaǵy jyldyń birinshi toqsanyndaǵy sybaılas jemqorlyq kórinisteriniń sebepterin egjeı-tegjeıli taldaý jáne naqty is-qımyl baǵdarlamasyn ázirleý qajettigin atap ótti.