Jambylda jedel járdem qyzmeti jandanýda
TARAZ. QazAqparat – Jambyl oblysynda jedel medıtsınalyq járdem stantsııasynyń qyzmeti jandanýda. Bul týraly óńirlik kommýnıkatsııalar qyzmetinde ótken brıfıngte oblystyq jedel járdem stansasynyń bas dárigeri Venera Balqybekova baıandady, dep habarlaıdy QazAqparat.
Oblys aýmaǵynda 1 stansa, 3 qosalqy stansa jáne 11 jedel medıtsınalyq járdem bólimshesi qyzmet kórsetedi. Óńirde 273 eldi meken jedel járdem kómegimen qamtylǵan bolsa, 99 eldi meken qamtylmaǵan.
Taraz qalasynyń jedel medıtsınalyq járdem stansa dıspetcherlik qyzmeti «Kómek» avtomatty basqarý júıesimen jabdyqtalyp, sanıtarlyq avtokólikterdiń GPS-navıgatsııasymen biriktirilgen. Bul naýqasqa jetý ýaqytyn barynsha qysqartyp, qozǵalys baǵytyn avtomatty túrde tańdaýǵa múmkindik beredi. «Kómek» avtomatty basqarý júıesi Taraz qalasynyń emhanalarymen ortalyqtandyrylǵan.
«Búginde oblys aýmaǵyndaǵy «103» nómirine baǵytalǵan barlyq shaqyrtýlar atalǵan stansanyń Taraz qalasyndaǵy bas ǵımaratynda ornalasqan Call-ortalyǵyna túsýde. Sondyqtan stansa mamandarynyń biliktiligin arttyrýǵa mán berýdemiz. Bıyl «KAZMEDCONSULT» oqý-klınıkalyq ortalyǵynyń bastamasymen Jol kartasy aıasynda 124 dıspetcher «Qońyraýdy ustap qalý júıesin engizý» boıynsha biliktilikterin kóterse, Call-ortalyǵynyń eki dıspetcheri Nur-Sultan qalasyna trener-dıspetcher oqýyna jiberilgen», - dedi Venera Balqybekova.
Jedel járdem qyzmetine júginýge kelsek, bıyl toǵyz aıda 429 655 adam qońyraý shalypty. ıAǵnı ótken jyldyń tıisti kezeńimen salystyrǵanda 3444-ke azaıǵan. Al qyzmet kórsetilgen shaqyrtýlar sany 31038-ge artypty. Esepti kezeńde jedeldiliktiń 3-shi jáne 4-shi sanattarynda keshigý baıqalǵan. Bul jedeldiliktiń 3-shi sanatyna jatatyn shaqyrtýlardyń kóbeıýine baılanysty ekenin aıtqan bas dáriger aldaǵy ýaqytta osy sanattaǵy sozylmaly aýrýlarmen aýratyn naýqastar emhanalarda der kezinde em qabyldap otyrsa, shaqyrtýlar azaıyp, shuǵyl naýqastar men jol apatynda zardap shekkenderge jedel járdem kóligi ýaqytyly jetedi degen oıyn bildirdi.
