Jambylda jastarǵa qyzylshaǵa qarsy mindetti egý bastaldy
TARAZ. QazAqparat – Jambylda qyzylshaǵa qarsy ekpe egý naýqany bastaldy. Ekpe 20 men 29 jas aralyǵyndaǵy jastarǵa mindetti. Bul týraly Jambyl oblystyq Taýarlar men kórsetiletin qyzmetterdiń qaýipsizdigi jáne sapasyn baqylaý departamenti basshysynyń orynbasary Ǵazız Nadýev aıtty, dep habarlaıdy QazAqparat.
Dúnıejúzilik densaýlyq saqtaý uıymynyń derekteri boıynsha Eýropa elderinde qyzylsha aýrýynyń keń taralýy jáne ósýi ekpeniń der kezinde salynbaǵandyǵynan dep tanylǵan bolatyn. Mundaı qolaısyzdyq Qazaqstandy da aınalyp ótpedi.
Mamandardyń aıtýynsha, 2018 jyldyń qarasha aıynan bastap bizdiń elde de qyzylsha aýrýyna shaldyǵýshylar sany artqan.
«Aýrýshańdyq kóbine 0-1 jasqa deıingi ekpe egilmegen balalardyń arasynda tirkelýde. Osyny eskere otyryp, aǵymdaǵy jyldyń sáýir aıynan bastap 9-10 aılyq 11 myńnan asa balaǵa egý jumystary júrgiziledi. Buǵan 3 myńǵa jýyq dáriger qamtylǵan. Al endi aýrýshańdyqtyń aldyn alý maqsatynda óńirde 20 men 29 jas aralyǵyndaǵy toptarǵa qyzylsha men qyzamyqqa qarsy qosymsha ımmýndaý naýqany bastaldy»,- Ǵazız Nadýev.
Jambyl oblystyq densaýlyq basqarmasynyń juqpaly aýrýlardy táýekelderin basqarý konsýltatıvti-ádistemelik ortalyǵynyń basshysy Gýlıa Mırzabekova oblys boıynsha 428 naýqas osy ınfektsııamen aýyryp, em alyp shyqqanyn aıtady.
Osy rette qyzylsha qandaı aýrý degen suraqqa da mamandar jaýap qatty. «Basty belgileri denege bórtpeler shyǵyp, jótel paıda bolady. Kóz shyryshty qabaty titirkenip, adamda dene qyzýy kóteriledi. Іndettiń aldyn almasa pnevmonııa, júıke tamyr júıeleriniń buzylýy sııaqty asqynýlarǵa soqtyrady. Aýa tamshylary arqyly juǵady. Alaıda, aýrýdyń aldyn-alýda taptyrmas qural - balaǵa ekpe saldyrý», - deıdi Gýlıa Mırzabekova.
