Jambylda «Jas sarbaz» áskerı-patrıottyq qozǵalysynyń fılıaly quryldy
Elbasy óz Joldaýynda jasóspirimderge patrıottyq tárbıe berip, olardyń Otanǵa degen súıispenshiligin arttyrý úshin elimizde «Jas sarbaz» áskerı-patrıottyq qozǵalysyn qurý kerektigin aıtqan bolatyn. Memleket basshysy 5 qazan kúngi halyqqa arnaǵan Joldaýynda áskerı-patrıottyq tárbıeni jandandyrý, árbir mektepte osy jumystardy qolǵa alýdy tapsyrǵan edi. Bul birinshi kezekte respýblıkada qurylsa, kóp uzamaı Jambyl oblysy da «Jas sarbaz» qozǵalysynyń fılıalyn ashyp otyr. Ol negizgi tórt baǵytta jumys isteıtin bolady.
Osylaısha, kezdesý barysynda Qazaqstan Respýblıkasynyń Qorǵanys mınıstri Nurlan Ermekbaev, Jambyl oblysynyń ákimi Asqar Myrzahmetov jáne «Jas sarbaz» balalar men jasóspirimder áskerı-patrıottyq qozǵalysy» respýblıkalyq qoǵamdyq birlestiginiń tóraǵasy Meıirbek Meńdiǵalıev úshjaqty memorandýmǵa qol qoıdy. Bes jyl merzimge jasalǵan memorandým aıasynda taraptar jastardyń áskerı-patrıottyq tárbıesi salasynda jáne áskerı-qoldanbaly sport túrlerin nasıhattaýdaǵy yntymaqtastyq jáne ózara is-qımyl jasaýǵa kelisti. Óskeleń urpaqqa otansúıgishtik sezimniń, azamattyq jaýapkershiliktiń, elimizdiń salt-dástúri men mádenıetine degen qurmettiń qalyptasýyna birlese jaǵdaı jasalmaq.
Jıynda oblys ákimi Asqar Myrzahmetov «Jas sarbaz» jasóspirimder áskerı-patrıottyq qozǵalysynyń bolashaǵy zor ekendigin, bul jastardy tárbıeleýde mańyzdy qadam ekendigin atap ótti. Sol úshin de Elbasy tapsyrmasy Áýlıeata jerinde der kezinde oryndalyp otyr. Asqar Myrzahmetov endigi maqsat - elimizdegi jańa deńgeıge kóterilgen aldyńǵy qatarly fılıal bolý ekendigin aıtty. Budan keıin «Jas sarbaz» balalar men jasóspirimder áskerı-patrıottyq qozǵalysy» respýblıkalyq qoǵamdyq birlestigi Jambyl oblystyq fılıalynyń tóraǵasy Ashat Oljabaev sóz alyp, búginde fılıal jumysynyń qarqyndy júrip jatqanyn tilge tıek etti. Onyń sózinshe, búginde óńirde jastarǵa patrıottyq tárbıe berý maqsatynda 20 klýb, 14 úıirme jumys istep tur.
Basqosý barysynda Qorǵanys mınıstri Nurlan Ermekbaev tarapynan da birqatar usynys tústi. Ol «Jas sarbaz» jasaǵynyń shtabyn jańǵyrtylǵan «Jeńis» saıabaǵynda ornalastyrýdy usyndy. Óńir basshysy bul máseleniń sheshiletinin aıtyp, sendirdi.
Jıyn sońynda oblys ákimine Jambyl oblysynda áskerı- patrıottyq jumystardy jetildirý boıynsha óńirlik úılestirý keńesiniń tóraǵasy kýáligi men «Jas sarbaz» respýblıkalyq qoǵamdyq birlestiginiń tósbelgisi tapsyryldy.
Ǵıbrat Sembaı
