Jambylda jas balalardy zańsyz jumysqa alǵan kásipkerler anyqtaldy
TARAZ. QazAqparat - Jambyldyq polıtseıler balalardyń eńbegin zańsyz paıdalaný deregin anyqtady, dep habarlaıdy QazAqparat.
Jasóspirimder qylmysynyń aldyn alý, kámeletke tolmaǵandardyń zańdy ókilderiniń erip júrýinsiz túngi ýaqytta oıyn-saýyq mekemelerinde jáne turǵyn úıden tys jerde bolý derekteriniń jolyn kesý, sondaı-aq kámeletke tolmaǵandarǵa alkogoldik ishimdikterdi, temeki buıymdaryn satý maqsatynda Jambyl oblysynyń aýmaǵynda «Túngi qaladaǵy balalar» jedel aldyn alý is-sharasy ótti.
Onyń barysynda ıývenaldy polıtsııa ınspektorlary 14 nysandy (saıajaı, sharýa qojalyǵy, úılerdiń jertóleleri, vokzaldar, oıyn-saýyq mekemeleri) tekserdi.
Sondaı-aq aýlalarda, saıabaqtarda jáne jastar kóp jınalatyn oryndarda, oıyn-saýyq oryndarynda reıd júrdi.
Nátıjesinde 3 kún ishinde polıtsııa bólimine kámeletke tolmaǵan 326 bala jetkizildi.
Sonymen qatar, jeke kásipkerler jaýapkershilikke tartyldy:
– alkogol ónimin 21 jasqa tolmaǵan tulǵalarǵa satqany úshin - 10 jeke kásipker
– 18 jasqa tolmaǵan tulǵalarǵa temeki ónimderin satqany úshin- 1
– kámeletke tolmaǵandardy zańdy ókilderiniń erip júrýinsiz oıyn-saýyq mekemesine jibergeni úshin-21.
29 ata-ana jasóspirimderdiń túngi saǵat 22:00-den tańǵy saǵat 06:00-ge deıin júrgeni úshin jaýapkershilikke tartyldy.
- Budan basqa, oqýdan jaltarǵan jáne sabaqqa qatyspaıtyn 20 jasóspirim anyqtaldy, onyń 18-i oqýǵa qaıtaryldy, qalǵan oqýshylarǵa qatysty sharalar qabyldanýda. Sondaı-aq, polıtsııa qyzmetkerleri balalar eńbegin paıdalanýdyń 2 deregin anyqtady. Olar boıynsha qujattar Jambyl oblysy ákimdiginiń eńbek ınspektsııasy basqarmasyna joldandy,-dep habarlady Jambyl oblysynyń polıtsııa departamenti jergilikti polıtsııa qyzmeti basqarmasynyń bastyǵy Rahymberdi Áshkeev.
