Jambylda jarylystan zardap shekken 75 nysan qaıtadan qalpyna keltirildi

TARAZ. QazAqparat – Jambyl oblysynyń ákimi Berdibek Saparbaev jeksenbi kúni Baızaq aýdanyndaǵy qalpyna keltirý jumysymen tanysty. Aldymen Qaınar aýylynda bolǵan aımaq basshysy jóndeý-qurylys sharalarynyń sapaly ári merziminde oryndalýyna basa nazar aýdardy, dep habarlaıdy QazAqparat tilshisi.

Aýdandaǵy tótenshe jaǵdaı kezinde zardap shekken nysandardy tekserý jáne qalpyna keltirý úshin 5 jumys toby qurylyp, onyń quramyna qurylys basqarmasynyń, aýdan ákimdiginiń, Qazaq qurylys jáne sáýlet ǵylymı zertteý ınstıtýtynyń, jobalaý uıymdarynyń qyzmetkerleri jáne tótenshe jaǵdaı qyzmetkerleri engen.

Atalǵan jumys toptary Baızaqtaǵy Qaınar, Úshbulaq, Jibek joly, Tórekeldi, Bazarbaı, Kókbastaý aýyldaryndaǵy barlyq úıdi zerdelep, 159 turǵyn úı, 12 kommertsııalyq, 4 áleýmettik nysannyń zardap shekkeni anyqtaldy.

Onyń ishinde 35 úı men 12 kommertsııalyq, 1 áleýmettik nysanǵa jáne 1 aýylishilik jolǵa aıtarlyqtaı eleýli zardap kelgendikten, memleket esebinen jóndeý jumystaryn júrgizý boıynsha sheshim qabyldanǵan.

Sondaı-aq, aıtarlyqtaı zardap shekken ári buǵan deıin tozyǵy jetken Jibek joly aýylynyń №5 orta mektebiniń eski ǵımaratynyń ornyna salynatyn jańa mekteptiń qurylysy bastaldy.

Berdibek Saparbaev mekteptiń sapaly salynýyn, onda oqýshylardyń alańsyz bilim alýy úshin tıisti qolaıly jaǵdaı jasaýdyń mańyzdylyǵyna aıryqsha toqtaldy.

Qazirgi tańda ózge nysandar boıynsha jumys qyzý júrip jatyr.

Jeńil zardap shekken 3 áleýmettik nysan men 124 jeke turǵyn úı demeýshiler esebinen jóndelýde desek, búginde 3 áleýmettik nysan jáne 72 turǵyn úı qalpyna keltirildi.

Eleýli dárejede zardap shekken turǵyn úıler boıynsha da jumystar qolǵa alynǵan.

Berdibek Saparbaev barǵan Qaınar aýylynda mundaı 19 úı bar desek, dál búgin 6 úıdiń shatyry jabylyp, ishki árleý jumystary atqarylýda.

Jalpy bul sharalarǵa 12 merdigerdiń 187 jumysshysy, 22 tehnıkasy jumyldyrylǵan. Merdigerler búkil jumysty tıisti merzimde aıaqtaıtynyna sendirdi.

Oblys ákimi jergilikti turǵyndarmen, áskerılermen kezdesip, oı-usynystaryn tyńdady.