Jambylda jappaı tártipsizdikke qatysqan 57 kúdiktige qylmystyq is qozǵaldy

TARAZ. QazAqparat - Jambyl oblysynda jappaı tártipsizdikterge qatysqan 57 kúdiktige qylmystyq is qozǵalýda. Bul týraly oblystyq ákimdikte aımaq basshysy Berdibek Saparbaevtyń tóraǵalyǵymen ótken óńirlik jedel shtabtyń kezekti otyrysynda aıtyldy.

Qazirgi tańda Jambyl oblysynda jaǵdaı turaqty.

Shtabtyń málemetinshe, Jambyl oblysynda 4-6 qańtar kúni oryn alǵan jappaı tártipsizdikterge qatysqan 2723 kúdikti polıtsııaǵa jetkizilgen.

Quqyq qorǵaý organdary tarapynan júrgizilgen jedel operatsııalardyń nátıjesinde ustalǵandardyń 573-ine ákimshilik jaýapkershilikke tartylsa (o.i. 186 tulǵa 15 táýlikke qamaqqa alynsa, 52-ine aıyppul salynyp, 335-ine eskertý berilgen), 57-ine qylmystyq is qozǵaldy.

Ustalǵandardan tárkilengen jáne zańsyz aınalymnan alynǵan qarý-jaraqtardyń sany 206-ǵa jetti. (Qarýlaryn erikti turde tapsyryp jatqandar da bar).

Onyń ishinde 62 «Kalashnıkov» avtomaty, 13 snaıperli-vıntovka, 12 «Saıga» karabın, 24 tapansha, 3 arnaıy pýlemettik tapansha, 3 granatomet RPG, 48 tegis uńǵyly myltyq jáne taǵy basqalar bar.

Jappaı tártipsizdik saldarynan 273 adam medıtsınalyq mekemege júgingen, qazirgi tańda olardyń 8-i aýrýhanada jatyr.

15 adam qaıtys boldy (2-i PD jáne UQKD qyzmetkeri, qalǵany búlikke qatysýshylar).

Búlikshilerdi anyqtaý, quryqtaý boıynsha quqyq qorǵaý organdarynyń (Prokýratýra, Ulttyq qaýipsizdik, Polıtsııa qyzmetkerleri) qyzmetkerlerinen qurylǵan jedel tergeý toptary tarapynan arnaıy jumystar jalǵasýda.

Qazirgi tańda qoǵamdyq tártipti qamtamasyz etý jumystaryna oblys boıynsha 2040 quqyq qorǵaý organdarynyń qyzmetkerleri jumyldyrylǵan.

Aımaq basshysy jaýapty tulǵalarǵa zańsyz aınalymnan qarýlardy tárkileý jumystaryn belsendi júrgizýdi, qoǵamdyq qaýipsizdikti qamtamasyz etý sharalaryn jáne onyń ishinde jastar arasynda túsindirý jumystaryn kúsheıtýdi tapsyrdy.