Jambylda jańa joba aıasynda kásiporyndardyń jumysy jandana túsedi
TARAZ. QazAqparat – Jambyl oblysynda jańa joba aıasynda kásiporyndar men shaǵyn tsehtardyń áleýeti arttyp, jumysy jandana túspek. Bul týraly oblys ákimi Asqar Myrzahmetov Taraz qalasyndaǵy birqatar kásiporyndardy aralaý barysynda aıtyp, jańa jobanyń maqsatyna toqtaldy, dep habarlaıdy QazAqparat tilshisi.
Sondaı-aq, aımaq basshysy oblys turǵyndarynyń tabysyn arttyrý jobasymen qatar kásiporyndardy damytý jobasy da qolǵa alynyp jatqandyǵyn jetkizdi. Ol boıynsha kásiporyndardyń jumysyn jandandyrý men múmkinshiligin arttyrýǵa qolbaılaý bolyp otyrǵan máseleler anyqtalyp, olardy sheshýge baǵyttalǵan naqty is-sharalar jospary bekitilmek. Bul oraıda óńirdegi áleýmettik mekemelerdiń suranysyn jergilikti kásiporyndar tarapynan qanaǵattandyrý jaıy da joba aıasynda sheshimin tappaq. Osyǵan basymdyq bergen oblys ákimi barlyq kásiporyndardyń búgingi jaı-kúıin saralap, ondaǵy túıindi túıtkilderdi tarqatýǵa aıryqsha mán beriletinin atap ótti.
Qaladaǵy nysandardy aralaý barysynda aımaq basshysy «Aıvengo» JShS-niń tigin tsehy jáne gaz plıtalaryn qurastyrýmen aınalysatyn «Alima Delux» JShS-niń jumystarymen tanysty.
Atalmysh tigin tsehy jylyna 500 mıllıon teńgeniń ónimin óndirýge qaýqarly desek, aǵymdaǵy jyldyń basynan beri nebári 20 mıllıon teńgeniń ónimin shyǵarǵan. Kásiporynda toqsan tiginshiniń bir mezette jumys jasaýyna qajetti barlyq jaǵdaı men tehnıka jetkilikti bolǵanymen, búginde onda bar-joǵy 12 ǵana tiginshi is tigýde. Tsehta medıtsınalyq halattar, jamylǵylar, kórpeler, túrli kıim-keshek shyǵarylýda. Onyń dırektory Lıýbov Popova barlyq ónimderge taza, tabıǵı jergilikti ónimder qoldanyp jatqandyǵyn jetkizip, sapasynyń joǵary, baǵasynyń tıimdi ekendigin tilge tıek etti.
Sol sııaqty «Alima Delux» jaýapkershiligi shekteýli seriktestiginiń de gaz plıtalaryn qurastyrý isimen aınalysyp otyrǵandaryna eki jyldan asqan. Aıyna 150 dana gaz plıtasyn qurastyratyn kásiporynda qazirgi tańda 10 adam turaqty jumyspen qamtylǵan. Seriktestik basshysy Álııa Kómekbaeva aldaǵy josparymen bólisip, úlken zaýyt salýdy kózdep otyrǵandyǵyn, ol úshin jer máselesi jáne basqa da qajettilikter boıynsha qoldaýlar kerektigin aıtty.
Óńir basshysy kásiporyndar ónimderiniń sapaly ári baǵa tıimdiligine nazar aýdaryp, olardyń naryqtaǵy áleýetin arttyrý úshin jergilikti ákimshilik tarapynan tıisti qoldaý kórsetiletindigin bildirdi.
