Jambylda zańsyz sekseýil tasymaldaýshy quryqtaldy
TARAZ. QazAqparat - Jambyl oblysynda patrýldik polıtsııa batalonynyń qyzmetkerleri zańsyz sekseýil tasyp bara jatqan 45 jastaǵy Moıynqum aýdanynyń turǵynyn ustady, dep habarlaıdy QazAqparat.
Bul týraly oblystyq polıtsııa departamentiniń baspasóz qyzmeti málimdedi. Oqıǵa aǵymdaǵy jyldyń 4 shildesinde bolǵan.
«Jambyl oblysynda "Shý-Qordaı" tas jolynyń 58-shaqyrymynda "Kamaz 53212" markaly avtomashına tekserildi. Nátıjesinde 45 jastaǵy Moıynqum aýdanynyń turǵyny tıisti qujattarsyz 4 tekshe metr sekseýildi alyp bara jatqany anyqtaldy» delingen habarlamada.
Búginde atalǵan fakti boıynsha QR QK 339-baby boıynsha sotqa deıingi tergeý júrgizilýde. Sondaı-aq, sot-botanıkalyq saraptama taǵaıyndaldy.
Aıta keteıik, sekseýil aǵashy elimizde sırek kezdesetin jáne quryp ketý qaýpi tóngen ósimdikter qataryna jatady.
