Jambylda zań buzý faktileri 12 paıyzǵa azaıǵan
TARAZ. QazAqparat – Jambylda jyl basynan beri tirkelgen quqyq buzý faktileriniń sany 12 paıyzǵa tómendep, 7274-ten 6354-ke azaıǵan, dep habarlaıdy QazAqparat tilshisi.
Atap aıtqanda, óńirde páter urlyǵy - 37,4 paıyzǵa, kisi óltirý - 28,9 paıyzǵa, qaraqshylyq - 27,8 paıyzǵa, tonaý - 24,7 paıyzǵa kemise, asa aýyr qylmystardy ashý - 01,8 paıyzǵa, aýyr qylmystardy ashý - 85,3 paıyzǵa artqan. Bul týraly oblystyq polıtsııa departamentiniń esep berý jıynynda aıtyldy.
Aımaq basshysy Asqar Myrzahmetovke atalmysh polıtsııa departamentiniń bastyǵy Arman Orazalıev bıylǵy jyldyń alǵashqy úsh toqsanyndaǵy jumys qorytyndysy týraly baıandady. Ol qoǵamdyq oryndarda jasalatyn qylmystardy azaıtý úshin, atap aıtqanda usaq buzaqylyq, spırttik ishimdik ishý nemese qoǵamdyq oryndarda mas kúıinde júrý, sondaı-aq olardy jasaýǵa múldem tózbeýshilik qaǵıdasy boıynsha ákimshilik quqyq buzýshylyqtardy ýaqtyly anyqtaý sekildi aldyn alý boıynsha naqty sharalar qabyldanǵanyn aıtyp ótti.
Sondaı-aq, departament basshysy jyl basynda salynǵan aıyppuldy bıýdjetke óndirý týraly ákimshilik tarapynan toǵyz aıǵa qoıylǵan jospar 31 paıyzǵa asyryp oryndalǵanyn jetkizdi. Bul oraıda óndirip alýǵa josparlanǵan 407 mıllıon 381 myń teńge bolsa, búgingi kúni óndirilip jergilikti bıýdjetke túskeni 590 mıllıon 689 myń teńgeni qurap otyr. Sol sekildi esepte turǵan adamdarmen jumysty uıymdastyrý jáne otbasy-turmystyq salada jasalatyn qylmystardyń aldyn alý máselesi de erekshe nazarda eken. Naqtyraq aıtsaq, otbasylyq-turmystyq qatynastar salasynda jasalǵan qylmystar sany 28,1 paıyzǵa qysqarǵan.
Óńir basshysy Asqar Myrzahmetov jumystyń júıeliligine, ákimshilik ister boıynsha aıyppuldardyń qatańdyǵyna nazar aýdarýǵa shaqyrdy. Kámeletke tolmaǵandarǵa alkogol satatyn bıznes sýbektilerinen lıtsenzııalardy qaıtaryp alý, barlyq jol erejesin buzýshylardy ataǵy men laýazymyna qaramastan qatań jazalaý, vandalızm faktilerimen ymyrasyz kúresý, ekologııalyq jáne tabıǵatty qorǵaý, mal urlyǵyn azaıtý máselelerine aıryqsha kóńil bólýdi mindettedi.
Asqar Isabekuly quqyq qorǵaý organdarynyń jumysyn jandandyra túsýdi, salada atqarylatyn jumystardyń az emestigin eskerntip, túıindi túıtkilderdi sheshý úshin muqııat taldaý jáne keshendi tásil qajettigin basa aıtty.
Jıynda azamattardyń qaýipsizdigin jáne kóshelerdegi tártipti qamtamasyz etýdiń mańyzy, mektep ınspektorlarynyń mártebesin kóterý bastamalary saralandy.
