Jambylda úsh tildi meńgergenderdiń úlesi 24 paıyzdan asty

TARAZ. QazAqparat - Jambyl oblysyndaǵy memlekettik tildi meńgergen turǵyndardyń úlesi 98,3 paıyz, orys tilin meńgergenderdiń úlesi 92,3 paıyz, al aǵylshyn tilin meńgergenderdiń úlesi 25,1 paıyzǵa jetken. Sondaı-aq úsh tildi, ıaǵnı qazaq, orys, aǵylshyn tilderin meńgergenderdiń úlesi 24,1 paıyzdy qurady, dep habarlaıdy QazAqparat.

Bul kórsetkishter ótken jyly óńir turǵyndarynyń tildik ahýalyna júrgizilgen áleýmettanymdyq-lıngvıstıkalyq zertteýdiń nátıjesine sáıkes naqtylanǵan. Osy oraı aıta ketý kerek, byltyr oblystyq tilderdi oqytý ortalyǵynda 3577 tyńdaýshy oqysa, onyń 1333-i qazaq, 1650-i aǵylshyn, 594-i orys tilderin meńgergen. Aımaqtaǵy memlekettik mekemelerdiń shyǵys qujattaryndaǵy memlekettik tildiń úlesi - 99 paıyzdy quraǵan.

Jalpy, QR tilderdi damytý men qoldanýdyń 2011-2019 jyldarǵa arnalǵan memlekettik baǵdarlamasyn iske asyrý maqsatynda ótken jyly oblystyq bıýdjetten 64,1 mln teńge bólinip, 7 áleýmettik joba aıasynda 200-ge jýyq is-sharalar ótkizilgen.

«Tilderdi oqytý ortalyǵynda latyn negizdi qazaq álipbıine kóshý jóninde oblys turǵyndaryna ádistemelik kómekter kórsetetin «Rýhanı jańǵyrý: latyn álipbıi» kabıneti ashyldy. Respýblıkada alǵashqylardyń biri bolyp oblysta latyn grafıkasyna negizdelgen qazaq tili álipbıin jańa zaman talabyna saı ınternet-tehnologııalar múmkindikterin paıdalana otyryp oqyp, jazýǵa úıretý maqsatynda ınternettiń kez kelgen braýzerleri men smart telefondary arqyly kirýge bolatyn, azamattar úshin qoljetimdi, tegin ári ýaqyty shekteýsiz Qazalipbi.kz onlaın oqytý baǵdarlamasy ázirlendi» - deıdi oblys ákimdiginiń tilderdi damytý basqarmasynyń basshysy Sulýshash Qurmanbekova.

Aıta ketý kerek, óńirlik sala mamandarynyń ulttyq onamastıkany damytýdaǵy is-sharalarynyń arqasynda byltyr aımaqtaǵy nysandar men ákimshilik-aýmaqtyq birlikterge, onyń quramdas bólikterine 524 ataý berilgen. Sondaı-aq, kórneki aqparattarda memlekettik tildiń paıdalanylý dárejesi 86,4 paıyzǵa jetken.