Jambylda ulttyq halyq sanaǵynyń birinshi kezeńiniń jumystary bastaldy
Bul týraly búgin ÓKQ alańynda Jambyl oblysy boıynsha statıstıka departamentiniń basshysy Syrym Madıev aıtty,- dep habarlaıdy QazAqparat tilshisi.
Aıta keteıik, halyq sanaǵyn ótkizý merzimi bıyl 1 qyrkúıekten bastap 30 qazan aralyǵyna belgilendi. Al ony ótkizýge járdemdesý jónindegi komıssııa quramy da bekitilgen.
«Aldaǵy sanaq eki ádispen ınternet jelisin jáne planshetterdi paıdalaný arqyly ótedi. Jańa IT-tehnologııalardy paıdalanyp, sanaq ótkizý ádisi bizdiń elimizde birinshi ret josparlanyp otyr. Internet-saýalnama kezinde azamattar óz betinshe ózine jáne óziniń otbasy múshelerine elektrondyq sanaq paraqtaryn mamandandyrylǵan saıtta toltyra alady. Ekinshi ádis sanaqtan ótpegen azamattardy sanaq personaly jappaı aralap shyǵyp, málimetterdi jınaýǵa baǵyttalǵan», - dedi S. Madıev.
Spıker Jambyl oblysynda aǵymdaǵy jyldyń 1 maýsymynan ulttyq halyq sanaǵynyń birinshi kezeńiniń jumystary bastalǵanyn aıtyp ótti. Ol osy aıdyń sońynda aıaqtalmaq. Qazirgi ýaqytta ınterıýerler turatyn halyqty naqtylaý boıynsha úılerdi, turǵyn úılerdi jáne turǵyn emes úı-jaılardy aralaýdy júzege asyrýda. Aıtýly sharanyń ekinshi kezeńi ıaǵnı qyrkúıek-qazanda ótetin negizgi halyq sanaǵy ınternet-saýalnama jáne jappaı saýalnama bolyp bólinedi.
«Internet-saýalnama sanaq bastalǵan qyrkúıek aıynyń 1-nen qazan aıynyń 15-ine deıin 45 kúnge jalǵasady. Internet-saýalnama kirý www.sanaq.gov.kz veb-saıty arqyly júzege asyrylady. Respondentti tirkeý JSN, kýálik nómiri, mobıldik telefon nómiri, elektrondyq poshta, kod jáne rastaý parolin engizý arqyly iske asyrý josparlanýda. Telefon nómirin engizgennen keıin respondent kórsetken mobıldik telefonnyń nómirine nemese elektrondyq poshtaǵa rastaý kodymen SMS-habar alady. Bul málimetterdiń qaıtalanýynan saqtaıdy. 2 kezeńde sanaqshylarmen planshet arqyly on-laın, off-laın rejımde, onyń ishinde ınternet-saýalnamadan ótkenderdi qosa alǵanda, derekterdi jınaýdy jappaı aralaý arqyly júzege asyrý kútilýde», - dedi departament basshysy.
