Jambylda túrmede jazasyn óteýshiler 17 myńnan asa betperde tikken
TARAZ. QazAqparat – Jambyl oblysy boıynsha QAJD JD-158/7 mekemesinde qaýipti indetke qarsy jumystar kúsheıtilip, betperde tigý isin aıryqsha qolǵa alǵan, dep habarlaıdy QazAqparat.
Atalǵan túzeý mekemesinde koronovırýstyń aldyn alýǵa baǵyttalǵan negizgi sharalar qabyldanyp, ınfektsııanyń taralýyna jol bermeý maqsatynda tıisti sharalar qolǵa alyndy. Nysan tolyqtaı oqshaýlaný rejımine kóshken. Mekemede sanıtarlyq-epıdemıologııalyq jaǵdaıdyń turaqtylyǵyn saqtaý jáne aldyn-alý sharalaryn kúsheıtý boıynsha júıeli jumystar júzege asyrylýda.
Túzeý mekemesi búginde medıtsınalyq maska tigýge qyzý kirisken. 19 naýryzdan bastap túzeý mekemesindegi tigin tsehynyń jumysy erekshe kún tártibine aýysty. Osyǵan baılanysty «Eńbek-Taraz» respýblıkalyq memlekettik kásipornyna tıesili tsehta 27 jazasyn óteýshi túrli jumysqa jumyldyrylǵan.
«Jazasyn óteýshiler pishý, tigý, daıyn ónimderdi suryptaý isimen aınalysady. Olardyń qataryndaǵy 17 tiginshiniń árqaısysy 8 saǵat jumys kúninde 110 maska tigýge tıisti. Jigitter kúnine 1700-den 2000-ǵa deıin betperde daıyndaıdy. Ónimniń sapasy joǵary, 100 paıyz tabıǵı ónim ıaǵnı, maqtadan tigiledi. Allergııalyq qarsy kórsetkishi joq»,-deıdi tseh sheberi Raýan Júnisovtyń.
Munda sanıtarlyq talaptarǵa asa mán berilip, jumysshylar arnaıy kıimdermen jabdyqtalǵan. Medıtsına bóliminiń bastyǵy, ádilet maıory Begjan Asanov jumys barysyn qadaǵalap, óndiristiń basy qasynda júr. «Syndarly sátte halyq, el ıgiligi úshin «teńizge quıǵan tamshydaı» bolsyn qol ushyn sozǵanyna jazasyn óteýshiler dán rıza. Sondyqtan óz isine asqan jaýapkershilikpen qarap, bar kúsh-jigerin jumsaýda. Búgingi kúnge deıin 17 myńnan astam betperde tigilip, ázirlendi. Munymen toqtap qalmaq emes. Tapshylyq týyndamas úshin jappaı karantın aıaqtalǵansha betperde tigý jalǵasa bermek», -deıdi B.Asanov.
Aıta keteıik, JD-158/7 mekemesiniń bastyǵy, ádilet podpolkovnıgi Almasbek Azızbekovtyń sheshimimen 27 azamatqa madaqtaý jarııalandy. Sonymen qatar «Eńbek-Taraz» kásiporny eseli eńbek etken jandarǵa jalaqyǵa qosymsha syıaqy taǵaıyndady.
