Jambylda turaqtandyrý qorynda 3-6 aıǵa jetetin azyq-túlik bar
Máselen, oblystaǵy áleýmettik 4 taýar — nan, sút, pııaz, qant baǵasy respýblıka boıynsha eń tómengi deńgeıde. Taǵy 4 taýar kúnbaǵys maıy, sary maı, aıran, qus eti tómengi úshtikte. Qalǵan taýarlar ortańǵy deńgeıde qalyptasyp, baǵasy joǵary taýarlar tirkelmegen. Bul týraly óńirlik kommýnıkatsııalar qyzmetinde ótken brıfıng barysynda oblystyq aýyl sharýashylyǵy basqarmasynyń basshysy Qaırat Amanov aıtty.
Ol aldaǵy ýaqytta baǵanyń birqalypty bolýyna turaqtandyrý qoryndaǵy taýarlardyń jetkilikti mólsheri áser etpek deıdi. Máselen, qazir qorda 3-6 aıǵa jetkilikti azyq-túlik bar. Olardyń qatarynda 444 tonna qant, 173 myń dana jumyrtqa, 53 tonna qaraqumyq, 1500 tonna un, 181 tonna kúnbaǵys maıy bar. Budan ózge jalpy 11 ataýly taýarlardyń 3 382 tonna qory jınaqtalǵan.
Aımaqta aǵymdaǵy jyldyń basynan qor arqyly 1202 tonna taýarlar berilgen. Bul ótken jylmen salystyrǵanda 3,4 esege artyq. Byltyrǵy kólem 349 tonna bolatyn. Ótkerilgen taýarlardyń 300,3 tonnasy áleýmettik dúkenderge, 320 tonnasy aýdandar men iri saýda oryndaryna, 581 tonnasy nan baǵasyn turaqtandyrýǵa un kúıinde jiberilgen.
«Maýsym aralyq kezeńde kókónis baǵalaryn turaqtandyrý maqsatynda Túrkistan oblysynan 15 mamyrǵa deıin úsh jaqty jetkizý kelisimi negizinde qyryqqabat 55 teńgeden, oblystyń jergilikti óndirýshilerinen sábiz 100 teńgeden, pııaz 30 teńgeden, kartop 100 teńgeden iri 7 saýda jelilerine tikeleı jetkizilýde. Bólshek saýdada qosylatyn ústeme aqyny 5-15 teńgeden asyrmaý jóninde kelisimder jasaldy. Nátıjesinde, osy aptada qyryqqabat 3,2%, pııaz 2,7%, kartop 1,6% tómendedi»,-dedi Q. Amanov.
Turaqtandyrý tetikteriniń ekinshi jańadan iske qosylǵan baǵyty «aınalym shemasy». Bul boıynsha jyl basynda bólingen 632 mln. teńgege qosymsha 168 mln. teńge baǵyttalyp, jalpy 800 mln. teńgeni quraıtyn bolady. Aıta ketý kerek, jyl basynan beri oblysta 31 aýyl sharýashylyǵy jármeńkeleri ótti. Onyń 12 oblystyq, 19 aýdandyq deńgeıde ótkizilip, jalpy quny 157,5 mln. teńgeni quraıtyn, 691 tonna ónimder naryqtan 8-20% tómen baǵadan satylǵan.
